Anang lenyau adat, lenyau pengelala

SARATOK: Enti sema kitai enda meruan ngemeranka adat enggau main asal, utai tu tau lenyau, tau punas dudi hari, ku jaku tangkan Datuk Ali Biju.

Sapit Menteri Pengeluar Kuasa enggau Pengeraja Asal nya madah, enti sema utai nya nyadi, nya ngujungka kitai lenyau adat, lenyau bansa, lenyau pengelala.

Ku iya, nya kebuah Pekit Kumang Online 2021 Trofi YB Datuk Ali Biju diatur berambaika jaku Besaup Mekuhka Adat Enggau Main Asal Dalam Arus Pemansang.

“Reti rambai jaku pekit tu chukup dalam sereta mai reti chukup besai ngagai bansa kitai enti diperati manah enggau ngena pengelurus,” ku iya lebuh dirandau Suara Sarawak.

Ali ke mega Kaban Parlimen Saratok madah, tu taun kedua kitai raban bansa Dayak enda ulih berami ngintu Gawai Dayak baka selama ketegal igi penyakit Covid-19 balat amat ngerekai lalu ngeruga pengidup kitai.

Senutuk endar ku iya, Pekit Kumang Online tu diatur nyerumba Gawai Dayak enggau Ngiling Bidai ngambi ulih kitai ulih berami enggau beperindang ba media rama.

“Nambahka nya, aku temegah ati enggau gaga meda pengeras enggau pengelandik bala pemekit begagaka video catwalk enggau video kreatif nya.

“Aku pechaya bala mayuh udah teperindang sereta rindu ati meda pengelandik siku-siku pemekit.

“Berindik ari video kreatif tu mega, aku arapka nya tau narit ati tauka nambahka agi pengangkun belajarka adat enggau main asal bansa kitai.

“Tau dikerembai ngagai bala bukai kelebih agi ngagai bala nembiak rebak baru,” ku iya madah nyemetak.

Ke penudi, Ali deka nibarka jaku puji ngagai bala pemekit ti udah menang lalu ngagai sida apin mujr, arapka bala kita nguji baru ba pekit diatur ba taun deka datai.

“Tabi basa enggau puji besai ngagai semua bala peninga, pemacha media rama ke udah meri sukung ngagai pejalai pekit.

“Terima kasih besai ngagai bala komiti pengatur betuaika Seman Endoi ke udah kiruh ngatur pengawa, raban SDNU Saratok, bala pemekit sama enggau ngemujurka pejalai pekit taun tu.

“Enda tinggal mega, meri besai terima kasih ngagai bala penyukung ti udah bebendar bekimpin enggau ngundi pemekit dikerinduka ati diri empu.

“Besaup meh kitai mekuhka adat enggau main asal dalam arus pemansang. Kitai tu meh rebak ti nyaga bansa enggau adat bansa kitai,” tandu Ali nyemetak.

Suara Sarawak