Belajar ari rumah mesti bisi ‘daily, weekly target’

KUCHING: Ngembuan tagit belajar ninting minggu sereta ngemeranka latih bepelasarka peresa Sijil Pelajaran Malaysia (SPM) nyadi chuan Matthias Arnold Stanly belajar ngujungka iya mujur teulihka semua A dalam semua subjek peresa SPM 2020.

Nembiak ke belajar ba SMK Kalaka Saratok tu madahka diri berasai gaga sereta tekenyit laban enda nyangka bulih semua A dalam SPM ketegal napi penanggul pengerekai Covid-19.

“Jaku sukung peransang ari apai indai, bala kaban enggau bala pengajar semampai nyadi peransang aku napi peresa tu.

“Sida pechaya aku ulih napi peresa SPM tu enggau mujur lalu bulih pemutus ti dikearap,” ku iya lebuh dirandau Suara Sarawak, kemari.

Matthias Arnold, anak lumur tiga Stanly Ambir enggau Ernie Benedict. Iya madah diri madahka iya ngembuan juluk ati deka nyadi injinir.

Sida Matthias Arnold sebilik.

Madahka diri ukai muntang belajar ari rumah, tang iya enda putus pengarap lebuh ngatur taga belajar ba rumah enggau manah.

“Aku ngatur taga belajar lebuh ba rumah ngena chara tagit ninting minggu tauka ‘weekly target’.

“Chunto iya, dalam seminggu, aku deka belajar siti topik ari subjek baka Biologi.
“Ari ‘weekly target’ nya tadi, baru aku ngaga tagit ninting hari tauka ‘daily target’ iya nya ngabiska siti subtopik dalam sehari tauka dua hari,” ku iya.

Kelimpah ari nya mega, iya mega semampai ngaga latih ti bepelasarka peresa SPM baka latih tanya peresa SPM tahun ke udah lalu (Past Year Questions) enggau tanya peresa trial SPM ari negeri bukai (State Trials).

“Jadual belajar aku fleksibel, iya nya aku ulih belajar sebarang maya ti engkeman tang mesti chukup tiga jam pagi, tiga jam ngalih hari enggau tiga jam maya lemai enggau malam,” ku iya.

Ku Matthias Arnold, entara pemar ti ditapi iya lebuh belajar iya nya kurang motivasyen.

“Maya semua sekula di Malaysia ditutup ngenyit kena 9 November 2020 suba, semua nembiak nyengkaum aku berasai asa ati laban kami udah ba renggat kepenudi nyikap diri deka napi peresa SPM.

“Taja pia, aku semampai ngiga inisiatif tauka motivasyen ari ‘video youtube’ nembiak ke udah nyulut SPM taun ke udah lalu.

“Ari jaku sukung sida iya sereta cherita peneleba sida lebuh belajar nyediaka diri napi peresa SPM nya ke mantu aku ngulihka motivasyen aku baru,” ku iya.

Matthias Arnold meransang nembiak ti deka napi peresa SPM ke deka datai anang putus pengarap taja pan sida napi mayuh penanggul.

“Giga chara belajar ti pemadu engkeman ungkup diri empu, enti kita lelak belajar, ngetu dulu tang anang badu.

“Penguji ti ditapi kitai maya sekula tu deka ngasuh kita nyadi mensia ti ngembuan pengeliat ati dudi hari ila,” ku iya.

Ku nembiak ke baru beumur 18 taun tu, iya ngarapka mayuh agi nembiak Dayak bulih pemutus peresa SPM ti manah ba maya ti deka datai.

“Aku mega ngarapka semua nembiak Dayak seruran ngemeranka pelajar laban ari pelajar enggau status sosioekonomi aja kitai sebilik ulih ditikika nengah mobiliti rama,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak