Berasai lelengau nadai ngetas ranyai

KUCHING: Lebuh ingatka baru sebedau pengerekai Covid-19 suba, nyau deka genap rumah panjai bisi nirika ranyai ba puak ruai dikena ngerami Gawai Dayak.

Siku peranak peranak panjai Selibut, Song Julia Peter madah pengawa ngintu Gawai di rumah panjai enggau di mengeri jauh bebida laban atur pengerami di rumah panjai agi nitihka adat lama.

“Aktiviti nirika ranyai enggau pengawa ngetas ranyai mesti enda kala tinggal digaga maya Gawai nyadi di rumah panjai.

“Pia mega, pengawa nyeradak ai pengayu nadai kala tinggal, laban nya mih kelai Gawai diintu,” ku iya nusui kenang diri ngagai Suara Sarawak maya Gawai Dayak 2018 suba.

Tandu Julia, semua suku juru enggau kaban belayan endang dikangau pulai ke menua awak bela berami ngintu Gawai.

Alice rindu ngintu Gawai di rumah panjai.

“Maya nya meh awak endur kitai bebuti, berandau sereta nanggam baru kaul enggau orang di menua.

“Ambika banding maya pagi 31 Mei, kami bela kiruh nyendiaka pemakai kena malam nya baka ngaga ketupat, mansuh jani, mansuh manuk, besumaika kari manuk, nguring manuk enggau ke bukai.

“Udah nyumai, ngalih ke lemai kami ngatur bemacham pekit baka pekit nyumai, pekit Kumang anak mit, pekit poco-poco enggau pekit ngirup ai tuak pemadu bisa,” ku iya.

Pia mega, genap ruai di rumah panjai endang diias dulu seminggu sebedau begawai ngambika dipeda richah sereta rami.

“Lebuh tekenang ke pengawa ngintu Gawai ati aku chukup gaga sereta sinu laban empat taun udah enda begawai di rumah panjai.

“Taja pan ati tetegut deka pulai ke menua, aku nguji sabar nitihka atur perintah enda ngasuh pulai ke menua.

“Ngarapka Covid-19 jampat punas ngambika kitai agi ulih begawai baka kelia,” ku iya.

Kelimpah ari nya, Alice Umpi mega madahka sida ngena bot express pulai ke menua ngintu Gawai.

“Enda berasai lelak lama nganti lebuh mudik ke menua ketegal deka ngerami Gawai ba menua.

“Bai ati deka pulai betemu mua enggau aya, aki, ini, apai enggau indai semua pengelelak lenyau magang.

Sida Alice (tiga kanan) sebilik begambar ba pun ranyai.

“Kami di menua agi ngintu Gawai nitihka adat lama, nya ke ngasuh kami taja jauh di mengeri tetap pulai,” ku iya.

Alice madahka rumah panjai sida semina ulih dilawa nengah bot ekspres nuju Song, Kapit.

“Pengawa kami sebedau Gawai nyumai baka nyumai ruas pulut, munuh jani enggau munuh itit ngambika bisi disumai dikena ngintu malam 31 Mei.

“Baka nya mega sida ke nembiak numbuhka ranyai di ruai dikena ngisi awak lebuh deka nyeradak ai pengayu,” ku iya.

Iya madahka, taja semua nya semina ulih dikenang aja diatu, tang pengerami berami ngintu Gawai tetap meruan dikenang iya belama.

“Sinu ati laban enda ulih pulai ngintu Hari Gawai baka kelia. Tang nadai ku enggau laban penyakit Covid-19 banggat enda ulih diseliahka.

“Sama meh kitai nyaga pengerai diri empu dulu ngichakka kitai ulih ngintu Gawai ba taun baru,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak