BSH RM300 nyadi puku dagang sugu tinggi Flora

KUCHING: Flora Anot ransing ngemansangka dagang sugu tinggi berekat ari sukung enggau peransang apai enggau indai iya.

Iya mega ngarapka sugu tinggi tu ulih diangkat nyadi siti ari produk pematak dagang temuai ba menua Simunjan.

Peranak asal Kampung Melanjok, Simunjan madahka diri ngepunka dagang kraf tu kenyau ari pandemik Covid-19 balat ngerekai ba menua tu.

Berekat sukung enggau jaku peransang ari apai seduai indai, iya ngepunka dagang ngaga perengka ngepan asal kitai Iban baka sugu tinggi, tali ujan, tumpa enggau ke bukai.

“Tambah mega, aku endang rinduka pengawa seni enggau main asal baka nyura kenyau ari sekula suba.

LAKU… Sugu tinggi sekang tauka chekak mega entara sugu ti laku lalu tebal agi dibeli bala raban muslim. Sugu tinggi tu digaga aku empu ungkup bala kaban muslim ti ingin deka ngena ngepan bansa kitai.

“Dia aku mutus ati bedagang nengah media rama laban baka ke ditemu kitai, media rama meri empas besai dalam dunya dagang kemaya hari.

“Aku belajar ngaga sugu tinggi tu ari pengajar Kraftangan Malaysia, Annie Chai Min Fah. Iya mih ke puh ngajar dataika aku landik ngaga sugu tinggi nya.

“Chukup rindu belajarka pengelandik tu laban iya siku pengajar ti regas sereta landik endar ngaga bemacham bansa kraf kitai.

“Puh amat iya ngajar aku laban pengawa ngaga sugu tinggi tu mayuh kelikuh ngambi sugu tinggi digaga kitai nya manding dipeda.

“Pengajar Annie mega chukup siru lebuh ngajar dataika aku diatu nyau nemu ngatika diri ngaga sugu tinggi sereta berengkah nyual sugu tinggi digaga aku empu,” ku Flora nusika kenang manis iya belajarka pengelandik ngaga sugu tinggi tu.

MAKIN DIKELALA

Flora madah, iya berengkah ngaul diri ba dagang kraf tu dalam bulan April 2020.

Dagang kraf nya dipun ngena puku RM300 diterima ari Bantuan Sara Hidup (BSH) diberi perintah ba taun 2020.

Iya madah baru, belanja ari BSH nya mih dikena meli kereban ngaga sugu tinggi baka aluminium ke endang dibeli iya ari kedai sebelah Pasar Simunjan.

Ku iya, enti kereban mit ke bukai nya dibeli ari menua Sibu ba kedai online, Idea Enterprise.

“Puji Tuhan, naka diatu untung aku sebulan manggai RM2,000 lalu dagang aku mega makin maju sereta dikelala orang bukai.

“Naka diatu, menua dalam Malaysia pemadu jauh kala meli sugu tinggi aku nya ari Perak, siku indu benama Suzy Allen kena 24 April tu tadi.

ALUS… Sugu Tinggi Iban jegit mega entara sugu tinggi pemadu laku laban bala penguna rindu meda pengalus sereta pemanah ukir ba sugu tinggi nya.

“Pia mega, enda nyangka amat sugu tinggi digaga aku diudar siku lelaki benama Daniel Dan ari menua Brunei apin lama ke udah. Daniel tu ngudar sugu tinggi sekang ari aku.

“Lantang ati lebuh nerima timbal ari bala penguna ke kala meli sugu tinggi madahka diri tepantup ati meda pemanah keranjai jari aku.

“Puji Tuhan, nyentuk diatu aku semampai nerima udar ari bala penguna ba selampur Malaysia dataika kami sebilik sama betulung ngaga sugu tinggi laban deka nangkup peminta ari bala penguna.

“Sebedau pandemik, dagang aku kusut sereta bedau dikelala lalu aku semina nerima siti aja udar ba timpuh dua bulan.

“Maya Pengerami Gawai Dayak tu, aku nerima mayuh baka 16 udar sugu tinggi bepun ari bulan March nyentuk June tu tadi.

“Kelimpah ari nya, aku mega bisi ngaga promotion Gawai iya nya pakej sugu tinggi besereta marik seng enggau sumpin lalu rega bepanggai ngagai bansa sugu tinggi.

“Pengudah pandemik, dia dagang aku majak dikelala bala penguna media rama lalu nerima mayuh udah dataika aku nyau enda ulih tetangkupka peminta bala penguna.

“Bepun ari berita pasal duriankimchi mega sugu tinggi aku makin dikelala bala penguna di Semenanjung Malaysia enggau menua Brunei,” ku Flora mantaika pengaga ati iya.

PUH BEDAGANG

MANAH NYADIKA TEPA… Souvenir mini sugu tinggi nya entara produk pemadu dikerindu bala penguna laban manah nyadika tepa sereta nyadi kereban pengias ba kerita enggau rumah.

Flora madahka iya ngelakuka produk sugu tinggi tu ba media rama laban kitai bela nemu, semua orang bisi akaun Facebook kediri empu.

Nangkan nya, bemacham bansa produk dijual iya baka sugu tinggi Iban, sugu tinggi jegit Iban, sugu tinggi sekang, sugu lengkap enggau tali ujan marik seng.

Pia mega, tali ujan, tumpa simpai, gelang duit kaki, sekang buah puru, tuchuk sanggul enggau sugu tinggi mit ke engkeman nyadika tepa.

Ku iya, barang sapa ti deka meda keranjai jari sereta deka ngudar produk tu, kita tau ngelawa Facebook iya, Angelina Flora enggau Facebook Sugu Tinggi Iban.

“Mayuh pemar ditapi aku sekumbang aku ngaga sereta ngelakuka sugu tinggi tu.

“Kala mega tudah aku ke baru ngelakuka sugu tinggi tu tang nadai nerima udar bebulan nyentuk aku nyau putus pengarap.

“Tang bai ati keran ngelakuka sugu tinggi sereta perengka asal kitai Iban, aku naka ulih besabar sereta pechaya bisi orang deka meli sugu tinggi tu ila.

“Nyau kelama baru aku bisi nerima udar pengudah orang beratika pemanah sereta pengalus sugu tinggi digaga aku.

“Pemar kedua nya semina siti aja kedai nyual kereban dikena ngaga sugu tinggi ba menua Simunjan ditu ngujungka aku semina bebelika perengka nya bepanggai ngagai stok di kedai nya.

“Awak endur aku ngaga sugu tinggi mega pandak aja baka maya lepa laban bala anak aku agi mekang,” ku iya nerang baru.

Taja pia, iya lantang sereta gaga amat ati laban dagang makin maju berekat sukung enggau saup ari sida sebilik.

Flora madah, sida sebilik mih nyadika tiang sukung ngujungka iya ransing agi bedagang sereta nangkup peminta ari bala penguna.

Ba lansa sama, iya mega neladanka dua iku indu ke suah bekunsika jalai pengidup sereta chara bedagang sebelah media rama iya nya Lady Jay enggau Melissa Francis.

“Pemujur seduai ba dunya dagang meransang aku bebendar agi ngemansangka diri ngambi ulih mujur baka seduai.

“Enti seduai ulih maju ba dunya dagang, aku pen ulih, ku aku anak ati aku,” terang iya.

PUH BEDAGANG… Flora puh ngelakuka sugu tinggi iya sereta keran ngangkatka keresa asal kitai Iban.

PENYELAI PRODUK

Flora madahka penyelai produk iya ari orang bukai nya ari sukut ukir bungai ba sugu tinggi laban nya endang didero iya empu.

Iya mega nyura bungai ba sugu tinggi nya nitihka peminta bala penguna lalu produk ke nyelai digaga iya nya sugu sekang endang digaga bechuntoka chekak sanggul lintang bansa Melayu.

Naka diatu, iya madahka bala penguna semampai tepantup ati enggau keranjai jari sereta rinduka ukir digaga Flora.

Tang ku Flora, iya semampai nerima manah timbal dikenatai bala penguna nyema nya timbal negatif lalu naka ulih ngadu manah agi produk iya dikena nangkup peminta bala penguna dudi hari.

“Kitai mesti ngetanka pesaka asal tu laban enti nadai kitai nyangka pesaka tu deka lesap diserunyut arus pemansang.

MILIH KEDIRI… Entara produk dijual Flora.

“Pesaka nya kelai pengeraja asal peturun kitai lalu rebak dudi patut ngangkatka agi bemacham bansa kraf enggau main asal bansa kitai.

“Baka diatu, pengawa bedagang sereta mantaika pesaka kitai chukup muntang nengah media rama.

“Ba penemu aku, pengawa bedagang diatu chukup muntang sereta besai reti lalu kitai mesti ngembuan pemintar bekenaka teknologi digital.

“Ba aku, 90 peratus ari asil dagang ti dibeli penguna endang ari media rama magang. Nya kebuah, media rama tu chukup besai reti ngagai kami pedagang kelebih agi maya pandemik Covid-19 tu,” ku Flora nerang silik.

Ba lansa sama, Flora madahka iya ulih nembuka siti sugu tinggi nya ba timpuh dua ngagai tiga minggu.

MILIH KEDIRI… Entara produk dijual Flora.

Lebuh madahka rurun ngaga sugu tinggi tu, iya madahka chara tu dibagi ngagai dua iya nya ngaga papan sugu tinggi enggau ngaga tiang sugu tinggi.

Bekaul pengawa ngaga papan sugu tinggi, kesatu nya nentuka chura enggau papan sugu tinggi.

Udah nya ku Flora, iya deka nekap sereta ngukir chura ba dua papan sugu tinggi enggau nguntin ukir papan sugu tinggi ke udah diukir tadi.

Tembu nya, iya deka drill sugu plastik ti deka dilekat ba papan sugu tinggi.

“Chara keterubah ngaga tiang sugu tinggi nya, aku deka nyendiaka dulu penyampau tiang sugu nitihka bansa iya sereta ngelilit dawai ba sugu plastik ke udah didrill tadi.

“Udah nya aku deka ngelekat dua piak papan sugu tinggi ti udah dichura, diukir sereta diguntin tadi.

“Tinggang enggau utai ke berat sereta klip tisi pengelama semalam lalu lekat rod tiang ti udah diias nitihka peminta bala penguna,” ku iya rurun ngaga papan enggau sugu tinggi dataika udah tembu.

Entara produk pemadu laku dijual Flora naka diatu iya nya sugu tinggi jegit lalu ba timpuh dua bulan, 6 papan sugu tinggi udah dijual iya.

Produk kedua pemadu laku iya nya sugu tinggi mit ke manah nyadika tepa. Produk tu berengkah dijual iya sebedau Pengerami Gawai lalu 10 iti mujur dibeli bala penguna.

BAKA TU… Flora benung nguntin papan sugu tinggi ke udah tembu diukir nya.

ANGKUNKA PESAKA KITAI

Flora ngelalau rebak baru anang malu ngangkatka adat enggau pesaka asal kitai ngambi dikelala bansa enggau menua bukai.

Beduduk ari nya, iya mega ngelalau rebak baru anang enggai belajarka pengelandik ngaga produk kraf bansa kitai sereta anang malu bekenaka ngepan asal kitai lebuh bisi pengerami.

“Bala nembiak mega anang takut mungkal sereta anang putus pengarap nyema bisi ati ngaul diri ba dunya dagang kraf laban diatu bemacham chara dikena ngelakuka produk kraf.

DAGANG LAKU… Flora chukup gaga ati laban dagang dipungkal iya nerima peminta tinggi kelebih agi sida ke angkunka keresa lama baka sugu tinggi tu.

“Anang enda neladan enggau bechuanka sida ke udah mujur sebedau tu laban peluang endang mayuh dikena kitai ngerembaika pengelandik enggau penau diri kelebih agi ba jeman moden diatu.

“Aku arapka dagang aku majak dikelala ukai semina ba Malaysia tang ba serata dunya sereta ulih ngangkatka nama Sarawak ngambi pegari di mata dunya,” ku Flora madahka juluk ati iya sentang dagang kraf tu.

Iya mega ngarapka bisi bantu ari Kaunsil Pemansang Produk Pengelandik Jari Malaysia enggau Opis Menteri Dagang Temuai, Seni enggau Main Asal Malaysia.

Flora madah, pengudah iya berengkah belajar enggau Pengajar Annie, iya apin kala nerima kus tauka ngulu eksibisyen mandangka pengelandik ngaga sugu tinggi tu.

Iya madahka diri nambahka penemu ngaga sugu tinggi sereta belajar chara nyura nengah pelasar online baka Youtube aja.

Nya alai, iya ngarapka dagang sugu tinggi tu majak dikelala pengudah pansut ba Suara Sarawak lalu ulih ngulu kus tauka eksibisyen ari ejensi perintah tauka gerempung ukai dikuasa perintah (NGO).

Kelimpah ari nya, pengelebih ekonomi digital ba menua tu kelebih agi ngagai raban indu nya meri peluang ngagai indu ngintu ruang bilik bedagang ari rumah lalu ulih nambahka penatai pemisi taja nadai pengawa tetap.

 


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak