Datuk Henry nyaup ABS ngatur program pengasih

KUCHING: Sapit Menteri Pemansang Menua Pesisir, Datuk Henry Sum Agong udah nyuaka pemeri RM20,000 ngagai Serakup Anak Borneo Semenanjung (ABS).

Sapit Chairman ABS, Gangging@Ling Sanggau madah, pemeri nya deka dikena sida mantu peranak Borneo ti tusah, sakit enggau kes pemati di Semenanjung Malaysia.

Ku Ling, pemeri tu besai reti ngambi mayuh agi peranak Borneo ti tusah dibantu sida.

“Aku ngarika ABS meri besai terima kasih ngagai Datuk Henry laban udah nyaup kami sereta nyuaka pemeri nya.

“Pemeri ari Datuk Henry tu chukup besai reti ba kami dikena ngemujurka pengawa mantu mayuh agi peranak ti tusah udah tu.
“Kami deka ngena manah agih belanja tu nipakka tuju kami ti keran deka mantu peranak Borneo di Semenanjung kelebih agi maya pandemik tu,” terang iya.

Nambahka nya ku Ling, sebedau tu ABS kala nerima pemeri ari Sapit Menteri Perengka Pengangkut, Datuk Hasbi Habibollah penyampau RM30,000 lalu lebuh nya dua kali iya meri RM15,000.

Iya madahka pemeri RM30,000 ari Datuk Hasbi nya dikena mantu raban ti tusah ba bulan April tu tadi.

Nambahka nya, Menteri Dagang Temuai, Seni enggau Main Asal Datuk Seri Nancy Shukri mega kala nyuaka pemeri RM10,000 ngagai ABS dikena sida bejalaika bemacham program ngintu pengelantang peranak Borneo.

Ling madah, Kepala Menteri Datuk Patinggi Abang Johari Tun Openg mega bisi nyuaka pemeri RM50,000 ngagai ABS.

Suara Sarawak