Gaji diputung ungkup rayat

KUCHING: Kaban Kabinet Perintah Nengeri (MMKN), Adun Gempung Parti Sarawak (GPS) enggau Sekretari Politik deka magi gaji dua bulan sida ngagai Wang Turu Penyangga Penusah Sarawak.

Opis Kepala Menteri nengah sebengkah peneranmg kemari madah, pekara nya udah dikerandau enggau Kepala Menteri, Datuk Patinggi Abang Johari Tun Openg, kaban kabinet Sarawak lalu pemutus nya disetuju semua kaban MMKN.

“Penyampau semua pemeri tu udah dikira dipelaba manggai RM3 juta.

“Nya alai, atur tu mandangka pengeransing perintah GPS mantu rayat ke tusah ketegal pengerekai pandemik Covid-19,” ku iya.

Penyampau gaji ke diputung sebulan ungkup kaban MMKN iya nya Kepala Menteri diputung 30 peratus, Sapit Kepala Menteri (25 peratus), Menteri tauka Speaker (20 peratus), Menteri Muda (15 peratus), Adun (10 peratus) enggau Sekretari Politik (5 peratus).

Ku Opis Kepala Menteri, Perintah GPS mega deka berundingka atur nyambung enggau neruska pemeri nya ninting bulan ungkup kaban MMKN, Adun GPS enggau Sekretari Politik ngambika diberi ngagai Wang Turu Penyangga Penusah Sarawak nyema pandemik tu lalu bedau suman dudi hari.

Kelimpah nya, Perintah GPS mega udah ngaga pemutus orang gawa perintah ba Sarawak mega deka meri gaji ari Elaun Tetap (ITK) sida ungkup dua bulan (Julai enggau Ogos).

Ku iya, Gred Utama A/ Gred Khas A enggau ke seikas dipinta meri 50 peratus ari ITK ke diterima, Gred Utama B/ Gred Khas B enggau ke seikas ke atas (20 peratus ari ITK ke diterima), Gred Utama C/ Gred Khas C sereta seikas enggau ke atas (10 peratus ari ITK ke diterima), Gred 43–56 denggau ke seikas
(5 peratus ari ITK ke diterima) sereta Gred 29-42 ke seikas (RM10 ari ITKA ke diterima).

“Penyampau pemeri nya mungkur semak 7,000 iku orang gawa perintah nyengkaum Opis Kaunsil Kandang Menua (PBT) sereta Serakup Berkanun Nengeri ke dipelaba manggai RM300,000.

“Taja pia, raban terabai menua ke bekaul enggau pengawa nagang pengerekai penyakit tu tau enda ibuh diputung gaji,” ku iya.

Ba pekara ke sama, Opis Kepala Menteri madah Perintah GPS deka minta semua Government–Linked Company (GLC) Perintah Sarawak sama meri bantu ngagai Wang Turu nya ke pemaik semua raban ti napi pandemik tu.

Ku iya, perintah GPS Sarawak deka ngemeratka pengelikun enggau pengelantang rayat di nengeri tu .

“Pengawa enda ngetu dipejalaika Perintah GPS Sarawak dikena mantu raban pengereja pengawa perintah napi pandemik Covid-19.

“Arapka pemeri tu ulih perintah nengah atur ngelandaika statistik kena rampit Covid-19 di Sarawak,”ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak