Jematan runtuh ba Kpg  Tanah Puteh deka diadu baru

KUCHING: Kaban Parlimen Puncak Borneo, Datuk Willie Mongin deka mutarka penusah jematan runtuh di Kampung Tanah Puteh.

Willie madah, iya deka berandau terus ngagai Menteri Pemansang Menua Pesisir, Datuk Dr Abdul Latiff Ahmad ngambi berundingka utai diguna dikena ngaga jematan ke tegap agi.

Ku Willie, iya berasai sinu ngenang penusah jematan runtuh di Kampung Tanah Puteh pengudah nerima kangau ari peranak dia urung pukul 6.15 pagi kemari pasal penusah jematan runtuh nya.

“Puji Tuhan, peranak ba Kampung Tanah Puteh dia nadai apa nama lebuh jematan tu runtuh.

“Ungkup penerang semua, aku udah telefon ngagai Penulung Direktor Opis Kereja Raya (JKR) Ir. Awang Mohd. Fadillah enggau Injinir Bagi Menua Serian, Ir. Oliver Ngabong pasal penusah tu.

“Pukul 9.30 pagi tu (kemari), aku deka ngabas penusah jematan runtuh nya begulai enggau staf JKR sereta Kaban Komiti (AJK) genturung pendiau tu.

“Nya alai, aku minta JKR berundingka chara mutarka penusah tu enggau lengkas ungkup pengelantang peranak dia,” ku iya nerang.

Iya mega madah, bisi dua pekara deka dirumban asil randau enggau JKR.

Kesatu nya, ngaga jematan besi ngambi peranak ba genturung pendiau ulih betengahka jematan nya lebuh nurun ke tanah.

Willie ke mega Sapit Menteri Pengawa Bekebun enggau Komiti madah, JKR deka nyendiaka keretas kereja pasal perambu ngaga jematan baru ti tegap agi ngagai Opis Menteri Pemansang Menua Pesisir (KPLB).

Nya alai, iya minta semua penguna enggau peranak dia semampai bejimat sereta anang betengahka jalai nya dulu nyentuk jematan besi sementara tembu digaga.

Iya madahka sida naka ulih berundingka chara ungkup pengelantang rayat.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak