Kantung sandik ukir Dayak mujur narit ati peranak menua luar

KUCHING: Pemungkal dagang Evianara.Co temegah enggau gaga ati lebuh produk iya udah dikelala ba mata dunya pengudah mujur narit ati siku peranak ari menua Australia.

Lebuh dirandau, Pemungkal Evianara.Co benama Doria Beraggai anak Martin Siba madah, apin lama ke udah bisi siku peranak ari menua Singapore nganjung pesan sereta nanya pasal produk dijual iya.

“Tu kedua kali udah aku nerima pesan ari sida ke diau ba menua luar laban rinduka pemanah ukir enggau chura dijual aku.

“Sebedau tu, menua pemadu jauh kala meli kantung tu nya siku indu Iban benama Cornelia Beremas ke diau ba menua Switzerland.

“Lebuh macha pesan madahka iya deka ngudar kantung nya, naka pengaga laban iya mega udah meli dua iti kantung iya nya Santubong chura mirah enggau Mini Black.

PRODUK LAKU… Doria gaga amat ati pengudah produk iya majak dikerindu bala penguna.

“Pengudah nerima udar nya, dia iya madahka diri tepantup ati enggau kualiti kantung nya.

“Cornelia mega sanggup mayar pos manggai RM375 pengudah lama udah beratika kantung dijual aku ngelama tu.

“Udah tu mega, Cornelia deka ngudar baru kantung ari aku nyadika tepa bakih iya di Switzerland,” ku Doria ngepunka randau enggau Suara Sarawak.

Naka diatu, Doria madahka iya semampai nerima udar ari bala penguna sekalika ba selampur menua enggau ari menua luar.

Doria mega madahka iya kala nerima udar ari bala penguna di Sabah, Semenanjung Malaysia enggau menua luar kelimpah ari ba Sarawak.

NGANGKATKA UKIR DAYAK

Peranak asal Ulu Paku, Spaoh tu madahka diri deka mandangka produk ke nyelai ari produk bukai ba makit ngelama tu.

Ku Doria, iya keran deka ngangkatka ukir Dayak ba kantung sereta bisi penyelai baka ulih nyelak nama penguna sekali.

“Produk aku tu nyelai ari orang bukai laban bisi nyempulang enggau ukir Dayak ba kantung nya kelimpah ulih nyelak nama nitihka peminta bala penguna.

“Aku chukup temegah ulih nyelak ukir Dayak ba kantung nya laban produk baka tu sangka aku apin bisi ba makit kitai.

“Tu sebagi ari chara aku ngangkatka ukir Dayak ngambi dikelala mensia mayuh ukai semina ba menua tu tang datai ba tikas entarabansa dataika produk tu narit ati bala penguna ari menua luar,” ku iya nerang baru.

Nambahka ku iya, entara produk pemadu laku ari Evianara.Co naka diatu iya nya Mini Black umbas iya pemesai lalu bechura chelum.

REMBUS MAKIT ENTARABANSA… Siku penguna benama Cornelia Beremas ari menua Australia nya penguna keterubah ti meli produk Evianara.

Iya mega madahka kantung dijual tu ngembuan mayuh pemesai berengkah ari pemesai pemadu mit ke manah dikena mai bekal dataika kantung pemadu besai ke manah dikena engkah gari.

Ngelansa silik, Doria madahka iya mega bisi nyual kantung ke bisi zip, bisi mega bansa ke button aja enggau Velcro strap tauka pelekat.

Iya mega madahka kain dikena ngaga kantung nya ari Jute tauka utai tumbuh ke diinjin dataika nyadi siti kantung.

Dikena ngemuntangka bala penguna ngudar, Evianara.Co bisi ngaga nama kantung nya baka Little Pegari nya kantung pemadu mit, Mini Series ke bisi tiga chura baka Natural, Chelum enggau Mirah nya umbas iya pemesai lalu nadai zip.

Pia mega, SE Sadau nya kantung umbas iya pemesai bechura chelum, bisi zip serea bisi kuchik di tisi kantung sereta Kumang Seris nya besai lalu bisi zip kelimpah bisi garis kalas enggau chelum di baruh kantung nya.

Berebak enggau nya, Keling Series ke bisi chura iya nya chelum enggau natural nya kantung besai, bisi zip sereta bisi kuchik ba tisi kantung nya.

Ku Doria, Santubong Series nya kantung besai, bisi button enggau pelekat ba kuchik lalu bisi tiga chura iya nya chelum, mirah enggau gadung.

Rafflesia Chelum nya kantung pemadu besai, bisi zip sereta manah dikena nyimpan gari lebuh mindah ke bukai.

EJEN KAMI… Entara ejen Evianara iya nya Mei enggau Jaclyn ari Sibu.

DAGANG MAKIN MAJU

Doria madahka diri ngepunka dagang tu kenyau ari bulan November 2020 lebuh iya nyadi ejen nyual jutebag ke alai bala penguna ulih nyelak nama ba kantung nya.

“Lebuh ke nyadi ejen nyual jutebag, dia aku lalu berunding deka ngaga ukir Dayak tauka Borneo.

“Naka diatu, aku semina nyual kantung nya aja tang nyangka dudi hari deka mansutka produk baru.

“Aku berasai chukup gaga laban dagang aku tu majak diterima sereta dikerindu bala penguna.

“Naka ke diatu, untung aku kala manggai RM7,000 sebulan, Puji Tuhan semua tu berekat sukung bala penguna ke enda leju nyukung sereta meli produk aku.

“Ari nya tadi, aku naka ulih nyendiaka produk ke bisi kualiti ungkup bala penguna kelimpah keterubah ngepunka dagang tu, aku ngena puku urung RM10,000.

“Orang ke balat meransang aku ransing agi ba dunya dagang tu iya nya Bykalers ke mega penyual Jutebag ari Semenanjung Malaysia.

“Pemuas nyadi ejen tadi, dia aku bulih penemu sereta belajar bedagang ngaga Borneo Jutebag.

“Kelimpah ari nya, orang ke lumur satu meri peransang ngagai aku nya apai indai, bala menyadi enggau kaban belayan ke semampai nibar jaku peransang ngambi kering agi nempuh semua penguji ba dunya dagang tu.

DIKERINDU… Penguna tetap Evianara benama Cynthia.

“Bala penguna mega besai reti ba aku, enti sida enda nyukung sereta meli produk aku, nyangka enda mih produk aku dikelala ba selampur Malaysia lalu dikelala ba tikas dunya.

“Terima kasih ke pemanah kita udah meli produk aku, nyukung dagang aku sereta andal enggau pechayaka aku nyendiaka mayuh agi produk dudi hari,” ku Doria seraya madahka Petara aja ulih malas pemanah sida.

Baka pedagang bukai, Doria mega naka ulih ngerebut peluang bekenaka teknologi moden enggau pelasar digital nipakka pemansang jeman diatu.

Nya alai ku iya, dikena ngelakuka produk tu, iya bisi ngelakuka produk tu nengah Instagram, Facebook Pages enggau Telegram atas nama Evianara.Co.

Ku Doria, iya mega bisi 20 ejen ke sama ngelakuka kantung tu nentuka bala penguna ti ngudar deka jampat agi bulih kantung nya.

JULUK ATI

“Aku berengkah nyual kantung ngena ukir Dayak tauka Borneo nya lebuh igi penyakit Covid-19 udah ngerekai ba menua tu.

“Tang berekat sukung ari bansa kitai empu, dia aku ulih ngemansangka dagang tu beduduk ari nerima mayuh peminta taja baru dalam dunya dagang tu.

“Taja pia, ba pengawa dagang endang bisi pemar iya empu lalu semua nya udah nyadi asam garam ba dunya dagang.

“Ambika banding, pemar ke suah diasaika aku iya nya bekal barang nya laun datai ketegal bilun enda mayuh tama ke Sarawak.

“Pia mega, kantung ke dikirum aku ngagai penguna di luar Sarawak baka ngagai Semenanjung lubah datai, kadang nyau dua minggu baru datai ba jari sida.

“Utai baka tu ngasuh aku tusah ati tang nasip amat bala penguna ke udah meli kantung aku endang meretika utai ke nyadi sereta besabar nganti barang sida datai,” ku iya nerang.

MILIH KEDIRI… Bemacham bansa kantung dijual Doria ngena chap dagang Evianara.Co

Doria madahka iya semampai nerima timbal ke manah ari bala penguna lalu mayuh mega muji pemanah kantung digaga sida.

Iya mega madah, bisi sekeda bala penguna tadi bisi peminta baka dekaka kantung mit nya digaga zip.

Ku Doria, dia enti bisi pengurang, aku naka ulih ngemansangka agi chara bedagang tu dudi hari.

Iya madah, naka diatu iya endang bedagang ari rumah laban pengawa ngaga kantung nya ulih digaga ba rumah sereta dijual nengah online aja.

Ba pengujung randau, Doria madahka iya deka mansutka produk baju ukir Borneo ti ulih nyelak nama sekali lalu deka nyendiaka bemacham bansa kantung nitihka peminta bala penguna.

Kelimpah ari nya, iya merambu deka begempung enggau pedagang bukai ari Borneo kelebih agi produk kraf dikena ngangkatka ukir Borneo ba mata dunya.

 

MILIH KEDIRI… Bemacham bansa kantung dijual Doria ngena chap dagang Evianara.Co

 

UKIR BORNEO… Siku penguna bekenaka kantung sandik dikumbai Mini Black Borneo Design B 

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak