Kumang ukai semina bajik, tang mega Petara tau ajih

SARATOK: Nyadi Kumang tu indu ke disebut naka pemajik-majik orang, nya kebuah nyadika jaku sema orang, bajik baka kumang.

Sekretari Majlis Adat Istiadat Negeri Sarawak (Mais), Salang Anak Manjan madah, kitai Iban kelebih agi ke agi bepegai teguh enggau arapka pengarap lama, pechayaka sida Keling Kumang tu meh nyadika Petara kitai.

“Nyadi beserimbai enggau pekit kumang ngena jalai online berebutka Trofi YB Datuk Ali Biju, iya nya Adun Krian ke mega Kaban Parlimen Saratok, aku deka nyebut mimit pasal Kumang dalam pengarap kitai Iban.

“Taja nadai kala meda nyengenda, tang kitai pechaya laban iya bisi ninggalka sekeda utai ke ulih dipeda ba dunya nyata, baka disebut orang Telaga Kumang.

“Aku mega kala nanya sida ke semak pengkalan feri Kuala Batang Lupar ke alai ba pulai tengah ai ku orang nya nyebut, bisi Telaga Kumang.

Salang Anak Manjan

“Sapa orang ti benung betubuh bisi tau bepungas ngena ai ba telaga nya ngambi gamal anak ke ada, enti sema iya indu deka bajik baka kumang. Nya jaku sema kitai Iban,” ku iya lebuh bekunsika kenang pasal Kumang.

Salang madah, nyadi Kumang tu ukai semina iya bajik, iya mega tau ajih nitihka pengarap kitai Iban. Sida tu meh dipechaya petara kitai Iban.

“Ukai semina ngembuan gamal bajik, iya mega tau ajih, sereta tau mega ngaga tauka nempa semua utai, landik ngereja pengawa pengawa sida ke indu, tu meh disema baka kumang.

“Ke lumur dua iya, dikumbai Lulong, enda tampak baka Kumang. Disebut kitai orang lumur dua ba pengarap lama kitai Iban. Nyadi iya ketiga nya dikumbai kitai Selinggar Matahari.

“Nya kebuah enti bisi Pekit Kumang, orang ke bulih penuduk ketiga nya digelar kitai Selinggar Matahari, nandaka iya orang ke lumur tiga,” ku iya ngelansa.

“Penerang nya tadi semina ngelansa pasal pemajik Kumang. Ari nya tadi, pekit mantaika ngepan asal baka tu endang patut disukung ngambi rebak baru ngelala baka ni gamal ngepan kitai kebendar,” ku iya nyimpul jaku diri.

Suara Sarawak