Lady Jay bekunsi penemu chara ngaga achar tubu

KUCHING: Tubu sebansa pemakai Dayak ti chukup nyamai kelebih agi sida di rumah panjai ke suah ngaga tubu nyadi jukut, disumai rebus, diulam enggau diempa chara bukai.

Taja pemakai tu kekadang mar digiga ba mengeri, tang enti lebuh ngusung tamu tubu mengkang dijual ba kontena tauka udah diagih ba pinggai.

Ba siku pedagang bepelasarka tubu iya nya Lady Jay, 41 taun iya bedagangka achar tubu berengkah ari lima kontena aja dikena iya nguji makit dagang tubu ba mengeri tu.

Indu asal ari Simunjan tu madah, iya belajar kediri ngaga achar tubu laban iya endang rindu nyumai.

“Achar tubu dikerindu mayuh orang enda ngira lelaki tauka indu, semua orang deka makai kelebih agi enti dipakai lebuh chelap.

Ari lima kontena diatu achar tubu Lady Jay nerima peminta ngagai 150 kontena.

“Chara ngaga achar tubu dipeda muntang, tang proses ngaga achar tu berenggat sereta begunaka awak ti lama,” ku iya lebuh dirandau Suara Sarawak, apin lama ke udah.

Lady Jay diatu diau ba Kota Samarahan madahka, chara makai tubu tu mesti dulu ditesap sereta direbus dikena muai pang.

“Rempah achar disumai aku sepengelama tiga jam ngambika chukup mansau sereta tan lama.

“Udah rempah mansau baru aku nabak ke tubu ti udah direbus lalu disumai aku baru sepengelama dua jam ngambika rempah serap enggau tubu,” ku iya.

Ku indai ngagai siku anak tu, bekal tubu digiga iya empu ngagai tamu tauka meli ari sida di menua.

Sebedau dichampur ba rempah, tubu ti ditesap mesti direbus dikena muai pang tubu.

“Maya bepun ke dagang tu aku nyual achar tubu sekontena urung 470 gram enggau rega RM10.

“Enda nyangka, peminta achar tubu majak mayuh udah nya, ngujungka aku diatu bulih peminta urung 150 kontena sekali ngaga.

“Mayuh pemeli ti kala ngasai achar tubu aku madah nyamai, engka nya ngasuh peminta achar tubu enda ngetu,” ku iya ketawa.

Taja pia, Lady Jay madahka bekal tubu majak mar diulihka diatu laban peminta achar tubu ti majak mayuh kelimpah pengerekai penyakit Covid-19 ti agi balat.

“Ketegal peminta achar tubu ti majak mayuh, nya ti ngujungka bekal tubu mar digiga.

“Taja pia, aku berasai gaga laban pemeli achar tubu aku sabar nganti bekal tubu datai baru aku ulih ngaga,” ku iya.

Tubu apin disumai.

Iya mega madahka, taja diau di mengeri pemakai bansa Dayak tu meruan nerima peminta ti manah ari nembiak rebak baru.

“Bisi siku pemeli, iya selalu meli acar tubu aku laban ku iya anak iya minat makai achar tubu.

“Kelimpah ngiga belanja, aku gaga meda pemakai bansa kitai tu enda lenyau laban tau mulai ke pengingat kitai agi mit kelia,” ku iya.

Iya mega ngarapka dagang tu majak diterima mensia mayuh nangkan tu ila sereta ulih dikerembaika ba maya ti deka datai.

“Naka diatu, aku semina nerima peminta ba Kuching, Kota Samarahan, Serian enggau Simunjan aja ketegal penanggul pengerekai Covid-19 ti nuntung menua diatu.

“Aku mega bedau bisi perambu deka nyual achar tubu tu ngagai luar Sarawak dulu,” ku iya.

Kelimpah bejual acar tubu, iya mega bisi nyual mayuh pemakai Dayak ke bukai baka berubut ikan, jukut ikan sultan sereta nyendika servis katering pemakai.

Sapa deka nemu enggau silik achar tubu ti digaga Lady Jay, kita tau ngelawa facebook iya Lady Jay Jmv.

 


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak