Lansa kenang Roy Jilum ba dunya pemerindang

LAGU Badu Bekaban nya mih ngangkatka nama siku penanyi benama Roy Jilum ba industri muzik Dayak Iban.

Ba berita pemerindang minggu tu, kitai deka bekelala sereta nanya nama kini berita pemadu baru ari penanyi asal ari Pantu, Sri Aman tu.

Lebuh dirandau Suara Sarawak, Roy Jilum madah diri udah tu deka mansutka lagu baru dalam taun tu ungkup bala peminat ke lama udah nganti lagu baru ari iya.

“Berita manah ungkup bala peminat ke lama udah nganti lagu baru ari ke sekali tu iya nya aku deka mansutka lagu rumpas baru dikumbai Dara Pemula.

“Lagu tu deka dipansut di baruh perabung Twin Tone Production (TTP) ungkup bala peminat ke lama udah nganti lagu baru ari aku.

KENANG… Roy Jilum begambar ungkup kenang enggau Menoah Hudson lebuh dikangau merindang lebuh Pekit Bintang KMP Renggat Kelima.

“Lagu baru tu mega ungkup bala peminat ke enda leju nyukung pejalai aku ba dunya pemerindang di menua tu.

“Enti nadai penanggul bukai, lagu baru tu deka dipansut pengudah Gawai ba Youtube Channel TTP enggau ditebah sebelah lubang ribut.

“Aku ngarapka lagu baru tu ulih diterima sereta dikerindu bala peminat ba selampur Sarawak.

“Taja pen mayuh penanggul nuntung kitai diatu tang kami naka ulih mansutka lagu baru ungkup bala peminat.

“Nengah lagu baru tu mih kami mantupka pengelengau nuju bala peminat kelai sukung kita ngagai kami enggau mega industri muzik Dayak.

“Arapka semua kita besabar nganti lagu baru ari aku au,” ku Roy Jilum nerang.

PENELEBA DIRI

Anak pengkuan ari empat iku diri menyadi madahka iya endang rinduka pengawa belagu kenyau ari mit.

Ku Roy, iya endang rinduka pengawa belagu kenyau ari mit sereta suah masuk pekit belagu ti diatur semak menua Sri Aman.

Asal bisi pekit belagu lalu bisi peluang, iya endang masuk aja sebarang pekit belagu laban rindu bepekit enggau bala bukai.

“Endang ari mit mih tudah aku tu rinduka pengawa belagu, asal bisi pekit belagu di Sri Aman, sigi enda masau peluang aku enggau orang ngeruh ai.

“Alah menang nya kira dudi diperunding, asal ulih bepekit sereta ngansah pengelandik diri.

“Sebedau nyadi penanyi, aku kala masuk bemacham pekit belagu baka pekit belagu lebuh Pengerami Benak, Pengerami Mantar Gawai enggau Pengerami Pantu.

MERINDANG… Gambar Roy Jilum lebuh dikangau merindang lebuh Pekit Bintang KMP Renggat Kelima.

“Chukup rindu ulih bepekit enggau pemekit bukai lebuh nya laban genap pemekit bisi pengelebih iya empu.

“Nyau pemuas nganjung diri masuk pekit belagu, aku kala megai gelar champion pekit belagu ba taun 2016 enggau 2017.

“Ba aku, nya mih kenang manis ke chukup berega kala diasaika aku laban pengelama udah bepekit, naka pengaga ati laban udah bulih gelar champion.

“Lebuh nya enda nyangka amat bulih gelar champion laban ba aku, semua pemekit bisi pengelebih iya empu ari sukut sada nyawa sida,” ku Roy nusuika kenang manis lebuh masuk pekit belagu suba.

SINGKANG KETERUBAH

RINDU BELAGU… Gambar Roy Jilum lebuh bepekit renggat kepenudi KMP Megastar Voice Challenge 2019

Pengudah masuk bemacham pekit ke bisi diatur ba menua benak pangka pasang nya, Roy nyingkang ngagai pekit ke besai agi sebedau nyadi penanyi.

Ku Roy, iya kala masuk pekit belagu KMP Megastar Challenge 2019 enggau bala artis KMP ke bukai.

Iya madah, ba pekit KMP Megastar Challenge 2019 lebuh nya iya mujur masuk renggat kepenudi.

Ku iya, naka pengaga ati laban mujur masuk renggat kepenudi laban bala bukai ke bepekit endang ngembuan sada nyawa ke nyelai sereta manah didinga.

“Enda ngadang ulih masuk renggat kepenudi lalu nya mih kenang manis sekumbang bepekit sebedau nyadi penanyi.

“Ba penemu aku, pekit belagu tu mih chara kitai ngansah pengelandik belagu ngambi kitai nemu nambah nyema bisi kurang ari sukut vokal, patah nyawa enggau ke bukai.

“Pekit belagu ke kala dipasuk aku mega ulih nambahka penemu bekaul dunya pemerindang di menua tu.

“Peneleba bepekit tu meransang aku ransing agi merindang bala peminat ke semampai nyukung ngelama tu,” ku Roy nusika kenang manis iya ba pekit nya.

Roy madahka diri udah ngebung ba dunya pemerindang di menua tu pengelama tiga taun berengkah ari taun 2018 nyentuk diatu.

Naka tu, iya udah mansutka dua lagu rumpas iya nya lagu Badu Bekaban enggau Indu Jarum Penanchum.

Leka lagu Badu Bekaban enggau Indu Jarum Penanchum nya ditengkebang Jesly Jabu enggau Matthius Mambang lalu dirikoding ba Kaban Music Production (KPM).

Naka diatu, lagu Badu Bekaban nya udah dipeda lebih 1,000 di Youtube Kaban Music Poduction (KPM).

Nambahka nya, lagu Indu Jarum Penanchum udah dipeda lebih lebih 1,100 ba Youtube Channel KMP mega.

KENANG MANIS

Karung album Kompilasyen Rajai

“Mayuh kenang manis lebuh merindang bala peminat ngelama tu kelebih agi sebedau pandemik Covid-19.

“Lebuh belagu, chukup rindu meda sukung ari bala peminat laban sida sanggup datai laban deka beperindang sereta nyukung pejalai aku tu.

“Sama mega enggau bala penanyi bukai ke sanggup datai laban deka nyukung aku.

“Kenang ke meruan dikeingat aku nya lebuh dikangau merindang ba Vokasional Betong.

“Tekenyit amat meda mayuh orang datai laban deka meda aku enggau penanyi bukai merindang lebuh nya.

“Ukai semina mensia mayuh aja teperindang tang kami mega gaga ati laban pengawa dikereja kami tu diterima sereta disukung kita.

“Nya mih kenang manis meruan dikeingat aku laban kira malam nya chukup tepantup ati meda sukung ari mensia mayuh.

“Taja baru tiga taun masuk dalam industri muzik Dayak tu, tang mayuh kenang manis enggau pait kala diasaika aku,” ku Roy tuchum ngenang semua nya.

Ku Roy, orang ke nyadi peransang iya endang sida sebilik enggau bala bakih.

Iya madah, berekat sukung apai, indai enggau menyadi ngujungka iya ulih beretan sereta meransang ati diri ngambi ngangkatka diri sebaka enggau penanyi bukai.

Ku iya, ba genap pengawa dikereja kitai endang bisi pemar enggau penguji iya ngambi kitai bebendar agi nyapai utai dikeingin ati.

Sama mega enggau iya ke nempuh bemacham penguji sekumbang masuk dalam industri muzik tu.

“Sekumbang masuk dalam industri muzik tu, mayuh penguji tauka kenang manis enggau pait kala diasai.

“Kala mih tudah diri nurun belagu ngelaban ujan ketegal entukar aku bisi penanggul.

“Ukai semina nya aja, kala mega aku belagu semina lebih 15 iku aja datai beperindang enggau aku.

“Enggau peluang tu, aku meri besai terima kasih ngagai kami sebilik laban semampai nyukung aku dalam dunya pemerindang tu sekalika maya tusah enggau senang.

“Terima kasih mega nuju semua peminat ke semampai nyukung aku ari suba nyentuk diatu.

“Nadai sukung ari kita, nadai mih aku dedegi atas panggau pemerindang.

“Semina Petara aja ulih malas jasa enggau pemanah kita ke enda leju nyukung aku.

“Sama mega nuju bala artis bukai laban semampai nyukung aku sereta sanggup datai lalu sama teperindang.

“Arapka kitai sama nyukung pangan diri sereta ngangkatka industri muzik Dayak tu baka industri muzik bukai.

“Jaku terima kasih mega nuju bala penengkebang lagu ke udah ngaga lagu ungkup aku enggau raban di KMP ke kala endur aku ngerikod lagu kelebih agi ngagai produser ke kala ‘sponsor’ album terubah aku dikumbai Kompilasyen Rajai,” terang iya.

EMPAS MEDIA RAMA

Roy madah, chukup pedis rekoding lagu maya pandemik tu kelebih agi kitai enda tau enda ngasika Atur Pengawa Standard (SOP) ti udah ditetapka.

Nya alai ku iya, ba media rama aja mih bala penanyi ulih mantupka pengelengau begulai enggau bala peminat.

Ku iya, media rama baka Facebook, Youtube enggau pelasar bukai chukup beguna kelebih agi maya pandemik Covid-19 tu.

Iya madahka bala penanyi ulih ngaga ‘live’ ba media rama dikena merindang sereta berandau enggau bala peminat.

Nangkan nya ku iya, sida mega ulih merindang bala peminat sebelah Youtube lebuh mansutka lagu baru.

“Pengelama nyadi penanyi, Puji Tuhan aku nerima mayuh timbal positif ke meransang aku ransing agi ngangkatka diri ba dunya pemerindang tu.

“Bisi ga seleka dua timbal negatif ke diterima aku tang ba aku, timbal nya mega nyadi peransang ngambi ngemetulka utai ke patut sekalika nya ari sukut sada nyawa tauka ke bukai.

“Kebendar, timbal negatif tu nentuka kitai ulih nemu diri pengurang tauka penimpang kitai lebuh belagu bepelasarka timbal ari bala peminat nya,” ku Roy mantaika penemu iya.

Nya alai, ungkup bala peminat ke deka nemu berita baru ari Roy Jilum, kitai tau med aba Facebook iya, Roy Jilum.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak