Magdaline belajar ngaga kek bai ati kasih ke indai

KUCHING: Ketegal nangkup peminta indai ti rindu makai kek, Magdaline Sambai Menit, 24 taun nguji belajar ngaga sereta ngujungka pengawa nya diatu mujur nyadi dagang dikemeranka iya.

Magdaline asal ari Kelebu Tatau, Jalai Semarakan diatu diau ba Bintulu madahka iya kala ngulu kelas ngaga kek ketungkah belajar suba.

“Udah ngambi kelas aku belajar kediri empu kelimpah belajar ari internet baka meda video youtube.

“Gaga amai ati aku lebuh meda indai aku ulih makai kek ke digaga aku empu, nya ke ngasuh aku semangat agi deka belajar,” ku iya lebuh ditanya Suara Sarawak, kemari.

Indai ngagai siku anak tu madahka, dagang iya berengkah ngerembai lebuh iya ngayanka pengawa nya ba media rama.

Entara kek ti udah digaga Magdaline.

“Ari nya, aku lalu bulih peminta ngujungka pengawa bejual kek tu nyadi pengawa penuh aku diatu.

“Ngena pelasar media rama tauka digital, aku mujur nyual urung 30 nyentukka 50 igi kek ti dijual enggau rega RM38 sigi.

“Aku mega bisi ngaga kek bajet ti dijual ari rega RM10 tauka ngaga kek nitihka peminta,” ku iya.

Tandu Magdaline, kenyau ngepunka dagang tu iya berasai gaga laban seruran nerima sukung bala kaban di Facebook enggau kaban belayan besemak.

“Bala bakih aku ti udah meli kek deka madah ngagai bakih sida ke bukai, ari nya orang berengkah ngelala kek digaga aku nyamai.

“Pia mega, orang rinduka kek aku laban ulih nitihka peminta enggau bajet sida,” ku iya.

Ngelansa pasal pemar ditapi iya, Magdaline madahka, kereban dikena iya ngaga kek agi bedau chukup.

“Bisi maya krim dikena aku ngias kek nemu enggai kembai ngujungka aku ngaga krim ti baru, bisi rugi mimit aku sentang nya.

“Kala mega, aku ngaga kek ti enda nemu mansau, nya ke ngasuh aku berengkah ngaga kek baru ari pun,” ku iya lebuh nusi penanggul ti ditapi iya suba.

Iya ngarapka diri ulih bulih kereban ti chukup dikena ngaga kek jemah baka oven, pengepok karan (mixer) enggau peti ais.

Ngagai sapa ti deka asil kek ti digaga Magdaline, mensia mayuh tau ngelawa Facebook iya ba Magdaline Sambai Menit tauka laman Facebook MS Bakery Homemade.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak