Marian enda kala tinggal kelas online

KUCHING: Siku agi nembiak ke nyulut ba peresa SPM 2020 iya nya Marian Sami Jeffery iya nya asal ari Sri Aman ti udah teulihka pemutus 7A 2B.

Ku Marian, lebuh lemai hari urung pukul 3 ngagai 4.30 lemai iya deka ngadu kerja rumah ti diberi pengajar awakka lempung agi pengawa pagi siti sereta bisi awak belajar malam.

“Sekula kami bisi ngatur taga kelas online ari pukul 8 pagi ngagai pukul 1 ngalih hari, aku empu enda kala tinggal nitihka kelas online tu.

“Lebuh malam hari pengudah tembu makai aku deka belajar baru nyendiaka diri ungkup subjek ti deka dipelajarka kami pagi siti tauka enti bisi topik ke enda entu nyengala ditemu aku,” ku iya.

Iya ti belajar ba Maktab Rendah Sains MARA Betong madahka pemutus peresa SPM tu chukup ngelantangka ati sereta disambut enggau ati gaga.

Marian Sami Jeffery lebuh belajar ari rumah.

Marian madah diri seruran nerima peransang ari apai (Jeffery Alfrida) enggau
enggau indai iya (Riong Gimang) sekumbang napi SPM 2020.

“Apai aku suah madah munyi tu, keni kitai deka meransangka diri empu sereta ngubah pengidup kitai sebilik awakka maju agi dudi hari ila?

“Ku apai aku, kitai ukai orang senang, nya alai ngena peresa SPM tu meh kitai deka ngepunka pengidup ti lebih mujur,” ku iya.

Anak bunsu ari tiga iku diri menyadi tu madahka iya deka nyadi lutur dudi hari ila.
Ngamatka diri enda muntang belajar lebuh pengerekai Covid-19, Marian madahka iya chukup gaga laban keresa dikena iya belajar ari rumah semua chukup magang.

“Aku nadai napi penanggul arus penyambung lubah, tang pemar ke ditapi aku lebuh belajar iya nya tusah ngiga pengajar lebuh bisi pekara deka ditanya.

“Aku enggau bala bakih mega tusah belajar begelumu laban suba nyema bisi belajar begelumu kami sama ulih betanya pangan diri tauka besilih penemu pasal subjek ti dipelajarka.

“Pia mega, aku napi penguji lebuh bisi ati limpang bemain telefon ngujungka kurang fokus,” ku iya.

Taja pia, Marian berumban sedarka penanggul sereta penguji tu lalu beguai ngulihka fokus baru.

“Aku ngena chara enda betangguh lebuh bisi pekara ke deka ditanya ngagai pengajar.

Marian Sami Jeffery sebilik.

“Aku enggau bala bakih mega ngaga belajar begelumu dalam online baka ‘video call’.

“Awak aku diatur enggau manah ngambika enda limpang tauka ngereja pengawa bukai ti nadai meri penguntung,” ku iya.

Ku Marian, iya ngelalau nembiak ti deka napi SPM ti deka datai ngambika belajar bebendar sereta ngena peluang tu enggau manah.

“Ngatur awak enggau manah nyadi pekara pemadu beguna lebuh belajar ari rumah laban nyema awak kitai enda diatur enggau betul, runding kitai nemu kusut.

“Anang nimbun kereja rumah laban nya tau ngasuh awak kitai belajar majak mar dudi hari ila,” ku iya.

Marian madahka, iya ngarapka diri ulih nyambung pelajar ba universiti ti manah ungkup nyapai juluk ati nyadi lutur serta bulih sekularship laban belanja dikena nyadi lutur mar serta lama.

“Tang aku cukup rindu ke pengawa nyadi lutur kenyau ari mit, nya alai aku ngarapka diri bulih sekularship.

“Pengabis nadai, sekularship nya ila ulih ngurangka tating belanja apai seduai indai melanja aku jemah ila,” ku iya.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak