Matthias enda nyangka bulih A ba subjek Jaku Iban

SARATOK: Matthias Arnold Anak Stanly,18 nadai nyangka diri teulihka pemutus ti manah dalam subjek Jaku Iban ba peresa Setipikit Pelajar Malaysia (SPM) 2020.

Anak lumur tiga ari lima diri menyadi tu madahka sebedau tu endang enda tentu landik tau dikumbai enda nemu bejaku Iban laban tebal agi bejaku ngena jaku bansa bukai.

“Aku berengkah belajar subjek jaku Iban lebuh aku masuk sekula ba pom tiga di Sekula Secondari (SMK) Kalaka di Roban taun 2017 pengudah kami pulai ke menua laban apai aku ti badu gawa ketegal pinchin nyadi Soldadu ba Port Dickson, Negeri Sembilan.

“Chukup tekenyit sereta berasai gaga bendar ati pengudah meda pemutus ti enda disadang tu laban nadai nyangka tudah diri tau bulih A dalam subjek jaku Iban.

“Enda berasai labuh ai mata laban ngenang pemar ditapi lalu semina sempat belajar dalam timpuh dua taun aja sebedau peresa berengkah,”ku iya ke mega peranak asal Rumah Jamu,Peligong Sebetan, ditu.

PEMUTUS NYULUT…Dalam peresa SPM nyadika peransang Matthias bebendar agi besekula jemah.
NEMBIAK PINTAR….Matthias (tengah) lebuh nerima perais pengudah dipilih nyadi Nembiak Nyulut SMK Kalaka taun 2018.

“Aku endang semampai ngaga perambu enggau taga jam belajar ti manah bepelasarka prestasi aku ba siti-siti subjek.

“Ambi chunto,nyema aku kurang pengelandik ba Sejarah,dia aku mesti ngatur sereta ngungkupka jam ti lebih agi ba pelajar nya dibanding enggau kebukai.

“Aku mega mayuh ngaga latih tauka ‘mock test’ nyengkaum chunto tanya peresa ari menua bukai enggau iyaka udah lalu (past year questions) ngambika aku nemu baka ni chara nyaut ti pemadu engkeman nitihka ‘skema penandaan’ peresa SPM,”ku iya.

“Siti ari chara aku iya nya aku enda kala enggau orang belajar nyentukka jauh malam laban pengawa baka tu tau bendar ngasuh pedis deka meretika pekara ti diajar pengajar maya belajar dalam kelas ketegal buntau,”tandu iya ti merambu deka minta bantu biasiswa ari Kompeni Petronas,Yayasan Sarawak tauka Khazanah Nasional Berhad udah tu ungkup belanja kena nampung belajar ngagai universiti.

“Meri besai terima kasih nuju semua lebih agi apai enggau indai aku,bala pengajar ti udah enggau naka ulih meri sukung ari semua sukut lalu semampai enda leju ngiri penemu ngagai aku ngelama tu nyentukka aku teulihka pemutus ti manah dalam peresa SPM tu,”ku Matthias ti ngembuan juluk deka nyadi Injinir.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak