Mayuh pedagang minta industri dagang temuai dibuka lengkas

KUCHING: Menteri Dagang Temuai, Seni enggau Main Asal, Datuk Seri Nancy Shukri andal industri dagang temuai ba menua tu ulih dibuka bulan September tu.

Ku iya, baka disebut dalam Pelin Ngemanahka Menua ngambi muka sektor rama ba bulan November tu tang iya andalka industri dagang temuai deka dibuka tumu agi ari nya.

“Tang, pekara tu bepanggai ngagai rayat empu lebuh nitihka Atur Pengawa Standard (SOP) ti ditetapka perintah,” terang Nancy.

Nancy mansutka jaku nya ba aum pemberita pengudah ngabas Palan Meri Vaksin Sektor Dagang Temuai Industri (PPVI) keterubah di Gerempung Gerija Sarawak, Jalai Stampin, ditu pagi tadi.

Terang Nancy, opis menteri dipelaba deka muka industri dagang temuai tumu agi iya nya ba bulan September.
Kebuah pia ku Nancy, opis menteri nerima mayuh peminta ari pedagang dalam sektor dagang temuai dekaka sektor nya dibuka ngambi ngidupka baru sektor ekonomi sereta industri nya empu.

“Nya kebuah, kami ngarapka kes Covid-19 majak nurun lalu kitai deka lantang ati enti kes majak kurang ngambi industri ulih dibuka,” ku iya.

Suara Sarawak