Mayuh pemar enda dipeda ditapi APM sekumbang pandemik

LINGGA: Pengerekai penyakit Covid-19 ba sitak menua pesisir nyadi pemar besai ditapi raban terabai komuniti lebih agi raban ari opis pengerai.

Ka pan enda, pedis tauka nyamai sida tetap neresa kampung, sungai ke jauh dikena nagang pengerekai penyakit nya.

Apin lama ke udah, lebuh bisi kes berampit Covid-19 ditemu ba Banting ditu seraban 14 raban ari opis pengerai dianjung nurun kin.

Banting, sebuah kandang endur ke chukup jauh lalu ulih dilawa nengah jalai sungai – jalai darat endang agi bedau bisi.

Misyen keterubah pengelama dua hari nya dikena bejalaika peresa Covid-19 ungkup peranak rumah panjang ditu.

SITI HUZAIMAH IBRAHIM

Puji Tuhan, semua bejalai enggau mujur. Tang, kala enda kita terundingka sapa ke ngatur ngemujurka pejalai sida pulai mansang kin?

Sapa ti nganjung sida? Orang ti nganjung sida iya nya raban ke bepekayan biru, Raban Penyaga Orang Periman (APM) Sri Aman nyengkaum ejensi bukai baka bomba.

Amat, enti dipeda enggau mata kasar, pengawa sida (APM) semina nyadi tukang nganjung aja.

Tang sida, ngembuan tanggungpengawa ke besai nentuka semua pengawa raban staf opsi pengerai mujur, kelimpah nentuka sukut pengelikun.

Nama utai nadai dipeda kitai, raban ke bepekayan biru kenyau ari tumu pagi udah nyendiaka entukar, seraya ngayuhka perau, udah nya nujah lutak…nyendiaka kereban pengangkut ba sungai mai raban staf opsi pengerai ke Banting.

Semina Petara aja nemu. Kenu ku Pegawai Penyaga Orang Periman Sri Aman Kapten Siti Huzaimah Ibrahim, lebih setahun pandemik nuntung menua raban sida nadai kala ngelarika diri ari pemar.

“Aku ngaku tanggungpengawa genap ejensi enda sama nitihka pengelandik diri empu lalu tu seruran besangkut paut, enti siti tim ari sida tu tumbang, tim bukai deka pedis.

“Nya alai, taja tanggungpengawa raban APM baka ke nadai dipeda, kami enda ibuh.

“Ambika banding, maya operasyen ke Banting ungkup tuju ngambi peresa Covid-19, nyangka nadai siku orang nemu tayar lori kami udah beputar puku 6 pagi.

“Datai ba Lingga urung pukul 7 pagi, lalu pekara lebih mar kaban nya nyau balut lutak mai perau ke sungai. Enti ai udah surut, nya mih utai ke nyadi, tang enti ai pasang nyangka enda bangat tusah,” ku iya nusi ngagai Suara Sarawak, kemari.

BEBATAK… Raban APM dibantu ejensi bukai matak bot ke sungai.

Ku iya mega, urung pukul 7.40 pagi baru ulih bekejang ari nyin.

“Nyema ai pasang raya, kitai ulih mai penumpang dalam 40 ke 45 minit, pejalai umbas iya pengelama laban menua nya jauh.

“Ditambah enggau pengangat ai sungai enggau baju ‘bulan’ ke dikena umbas iya pemedis. Tang, taja hari angat kami tetap meri terima kasih ngagai pengasih Allah SWT.

“Laban ke nyadi sebengkah ari ejensi ke diberi tanggungpengawa, kami chukup tepantup ati.

“Sekumbang pandemik nuntung, tanggungpengawa majak mayuh tang nya mih kami endang patut datai ngesah ke pemaik semua,” ku iya.

BEPANAS… Entara staf opis pengerai ke dianjung ngena bot APM ba operasyen ke Banting, Lingga.

Huzaimah taja pia beterima kasih laban pejalai gawa sida ke Banting mujur.

Raban sida mega diasuh ngambi orang ke dirampit Covid-19 lalu dianjung ngagai pasar Simanggang.

Iya ngaku, pengelelak bala kaban APM berupai ayan tang semangat sida ulih napi semua nya.

“Aku suah mesan, kitai enda tau ngaku alah enti perang bedau abis.

“Arapka pengawa kitai sehari tu mai berekat dudi hari ila, nya mih munyi sampi ti enda kala badu – selamatka menua aku ari keruga Covid-19,” ku iya.

SANGKAI DI BANTING… Staf Opis Pengerai mujur datai ba pengkalan Banting ke balat lutak ketegal ai udah surut.

 

BEJIMAT… Raban APM diasuh mai kereban dikena meresa Covid-19.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak