Palan Servis Parlimen Bintulu meli asil utai tanam rayat ti PKPD

BINTULU: Palan Servis Parlimen Bintulu ngamatka semaya diri meli dua tan asil utai tanam peranak rumah panjai ti diasuh nitihka Atur Mindah Betagang Bepekul (PKPD), kemari.

Kaban Parlimen Bintulu Datuk Seri Tiong King Sing madahka, pengawa nya diagaga ngambika ulih nambahka belanja ngagai peranak rumah panjai sereta ngurangka pengerugi ti ditapi sida.

“Sebedau tu sekeda peranak rumah panjai kompelin madahka sayur enggau buah ti ditanam sida benung nganti mansau sereta napi penanggul nyual berindik ari PKP.

“Sida enda lantang ati sereta irau nangika asil tanam enda ulih dijual ketegal atur nya ti nyekat pemindah sida,” ku iya dalam siti penerang di Facebook, kemari.

Ku iya ti mega Duta Khas Ngagai Menteri Besai ke Republik Rayat China, sida endang beratika pekara tu lalu besetuju nyema asil tanam udah mansau tang enda diproses enggau betul, nya ukai semina ngeruga penatai pemisi peranak rumah panjai tang tau ngasuh asil tanam nya jai.

“Nya alai, sehari tu (kemari) pengereja pengawa Palan Servis Parlimen Bintulu mujur ngumpul sereta meli dua tan asil tanam peranak rumah panjai berenggat,” ku iya.

Iya mega ngarapka kerejasama semua peranak rumah panjai ngambika sida terus nitihka PKPD ti dipejalaika ba rumah panjai sida laban pengawa nya tuju iya dikena nyelamatka nyawa.

Suara Sarawak