Pansik undang-undang pasal Undi18 dikemendar

KUCHING: Pansik undang-undang bekaul peminta nginsur tikas umur ngundi ngagai 18 taun diteruska.

Gerempung Pengundi Muda (Undi18) nengah siti penerang media kemari madahka Kort udah meri pemendar peminta sida ngaga pansik baru nitihka undang-undang pejalai Rang Undang-Undang (RUU) Undi18 dikena nginsur tikas ngundi ari 21 taun ngagai 18 taun.

“Kami bepegai teguh ngambika nembiak beumur entara 18 ngagai 20 taun ngembuan hak ngundi baka ti dipadahka ba Konstitusyen Perintah Besai.

“Penemu raban nembiak patut didinga diatu enti dibanding enggau sebedau tu kelebih agi lebuh maya ba musin pandemik sereta darurat,” ku penerang nya.

Penerang nya mega madahka, nyema pansik kort tu dikemendarka dipelabaka lebih 1.2 juta nembiak Malaysia ke beumur entara 18 ngagai 20 taun ti ditingkilka ari hak nya deka diberi peluang ngundi keterubah iya dalam sejarah Malaysia.

“Tu nyadi pemungkal ke pemadu beguna raban nembiak mansang ke mua ngulihka perintah ti adil enggau hak ngundi.

“Kami mega andalka kes tu dipejuraika nitihka merit awakka raban bekuasa nerang nyemetak pemutus sida nangguhka pejalai RUU Undi 18,” ku penerang nya.

Ungkup penerang, kes bechara tu bejalai serentak enggau raban Undi Sarawak ti diberi pemendar Kort Tinggi Kuching kena 29 Mei tu tadi ti deka diteruska enggau kes bechara bagi pansik baru undang-undang kena 20 June ti deka datai.

Kort Tinggi Kuala Lumpur udah netapka kes tu disambung baru kena 1 Julai ti deka datai.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak