Parlimen mesti dikategorika nyadi sektor ‘servis beguna’

KUCHING: Parlimen patut baum baru enggau lengkas dikena nyeliahka penyarut kunstitusyen enggau mega awakka kaban parlimen ulih betalat penemu pasal atur ke pemadu manah dikena mutarka penusah ketegal Covid-19 ja ke diatu.

Pemerati politik Unimas Dick Lembang Dugun madah, gerah dipansutka Yang di-Pertuan Agong (YDPA) apin lama ke udah minta Parlimen baum lengkas mesti diperati lengkas lalu mega patut diterima enggau dititihka perintah.

“Nadai kebuah nganti sampai bulan September enggau Oktober laban perintah udah merambu Parlimen patut baum baru.

“Demokrasi mesti bejalai lalu anang ngaga kedalih ti enda masuk runding,” ku tandu iya.

Kenu ku Dick, Parlimen mega mesti dikategorikan nyadi sektor ‘servis beguna’ lalu patut baum enggau lengkas sebedau abis timpuh Darurat.

Ku iya, sistem ekonomi, sistem pelajar enggau sistem pengerai benung enda manah.

“Kitai berati penyampau kes baru majak nambah, pia mega penyampau pemati mega nambah. Tu mandangka strategi perintah puntan dalam nagang pengerekai penyakit tu,” ku iya maya dirandau Suara Sarawak, semalam.

Nya alai, Dick madah perintah patut meretika pekara tu enggau semua pemutus ke patut digaga dikena mutarka penusah ketegal Covid-19.

“Rayat chukup merinsa ari nya – semua segmen rayat baka B40, M40, dagang, kereja enggau ke bukai. Semua kena keruga.

“Nya alai, Parlimen mesti baum lengkas dikena nentuka semua kaban parlimen ulih bela mansutka penemu pasal atur ke pemadu manah dikena mulaika pemanah menua kita, ari sukut ekonomi,” ku iya.

Nangkan ke nya, iya mega madah mensia mayuh mega deka nemu baka ni perintah mutarka pandemik tu, lebih agi bekaul enggau penanggul belanja.

“Kami rayat deka nemu baka ni bebilion ringgit belanja dikena perintah napi pandemik Covid-19. Perintah mesti lurus dalam ngatur pekara tu,” ku iya.

Ku Dick, bisi tiga pati pemerintah iya nya Eksekutif, Pekara Undang-Undang, enggau Akim patut bejalao dalam mutarka penusah ketegal Covid-19.

“Aku ngarapka perintah Perikatan Nasional (PN) tu bisi pengingin politik endur sida berunding muka baru aum parlimen berengkah ari diatu awakka semua kaban parlimen mansutka penemu bekaul atur mutarka pandemik tu.

“Patut nyadi perintah ke mereti enggau lurus napi penusah ketegal penyakit tu,” ku Dick nyemetak.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak