Peluang Bonnie Bunyau nempa nama ba Lumba Paralimpik Tokyo

KUCHING: Jurulatih angkat berat menua, Jamil Adam andalka Bonnie Bunyau Gustin deka mai pulai midul emas ba Lumba Paralimpik Tokyo ila.

Iya madahka diri bisi amat pengandal ngagai Bonnie pengudah beratika penyulut anembiak iya ba dua pekit dunya ke udah.

Ba Pekit Angkat Berat Dunya Fazza Ke-11 di Emiriah Arab Bersatu (UAE) kena Hari Dua tu tadi, atlit asal Kampung Baru Mawang, Serian nya mujur nempa rikod baru dunya (230kg) sereta bulih midul emas.

Bonnie mega mujur bulih midul emas ba Pekit Angkat Berat Dunya di Bangkok, Thailand pun bulan Mei tu tadi.

“Aku andalka Bonnie deka mai pulai midul emas ba Tokyo ila bepelasarka dua pekit dunya ke udah dipasuk iya apin lama ke udah,” ku Jamil nerang.

Jamil nyemetak madah, pekara ke pemadu beguna diatu iya nya nentuka Bonnie Bunyau ulih nyikap diri sebedau pekit di Tokyo nya.

Suara Sarawak