Pemanah leka lagu, sada nyawa Menoah Hudson dipuji peminat

KUCHING: Mayuh pemar ditapi sekumbang ngerikod lagu baru maya pandemik Covid-19, ku siku penanyi baru benama Menoah.

Taja baru ngebung dalam industri muzik Dayak tang nama Menoah majak dikelala pengudah mujur nyadaka lagu Renjan.

Menoah madahka diri chukup gaga ati laban penatai iya dalam industri tu disukung sereta dikerindu bala peminat.

“Terima kasih ke sukung kita ari lagu Renjan, Pudar lalu diatu lagu Gawai iya nya Berimbai Maya Gawai.

“Bisi kedua ulih nerima sada nyawa aku lalu bisi mega apin ulih nerima, enda ngawa… timbal ari kita seruran diterima aku sekalika nya ari sukut positif tauka negatif,” ku Menoah.

NGERIKOD LAGU… Gambar Menoah rambau ngerikod muzik video Pudar.

Naka tu, lagu Renjan ti ngangkatka nama Menoah sebaka enggau penanyi baru ke bukai udah dipeda lebih ari 610,000 ba Youtube Channel Kaban Music Production (KMP).

Pia mega, lagu Pudar ke baru dipansut ba Youtube Channel Kaban Music Production (KMP) kena 30 April tu tadi udah dipeda lebih 42,000 iku orang.

Taja baru dua bulan dipansut dalam Youtube nya, tang lagu Pudar udah nerima timbal ari 142 iku.

Ngelansa mimit timbal ari mensia mayuh, siku penguna benama Sandra Sann madah, tabi puji ngagai semua, lagu ti chukup manah, leka lagu ti manah, sada nyawa Menoah pen manah lalu sama mega enggau muzik video nya… semua manah. Arapka seruran mujur dalam dunya pemerindang kitai Iban. Tabi puji mega ngagai KMP.

Pia mega, siku agi penguna benama Denny Jilom madah, nyau diatu aku rindu ninga lagu Iban. Sada nyawa pen bisi tikas iya empu lalu muzik pen nyamai didinga. Meri pengaga ati ngagai penanyi rebak baru laban udah ngubah industri pemerindang menua kitai Sarawak.

KENANG… Menoah begambar ungkup kenang enggau sida ke bisi ngemujurka pengawa ngerikod muzik video Berimbai Maya Gawai.

CHARA BARU

Mulaika kenang ngerikod lagu maya pandemik tu, dia Menoah madahka iya napi mayuh penanggul lebuh ngerikod lagu Gawai taun tu.

Ku Menoah, chukup pedis ngerikod lagu maya pandemik tu tang puji Tuhan, semua pengawa nya udah mujur dipejalai berekat sukung enggau kerejasama semua.

“Entara pemar ditapi aku enggau tim bukai iya nya kebendar, muzik video lagu Berimbai Maya Gawai nya deka dirikod ba sebengkah resort ke bisi pegung nyemerai tang seminggu sebedau pengawa ngerikod nya nyau dikinsil ketegal kes Covid-19 ke majak nambah.

“Tujuh iku rapper digiga aku tang rapper ke lapan ti mujur sama dalam pengawa ngerikod lagu Gawai tu.

“Ke bukai nya enda nyadi ketegal pandemik Covid-19 tu, sinu mih asai ati tang nadai ku enggau ketegal penusah baka tu.

NITIHKA SOP… Gambar Menoah rambau merindang sereta ngerikod lagu nitihka SOP.

“Aku mega bisi ngangau dua orang beberita dalam industri tu enggau bala bukai tang sida enda ulih enggau ketegal pandemik tu mega.

“Chukup mayuh penguji baka videographer asal ari Bintulu mega ditukar.

“Nasip amat ga lebuh nya aku baru tembu ngerikod muzik video lagu Pudar.

“Ari nya, videographer omara ari Omara Mediaworks setuju nyaup aku ngerikod muzik video lagu Gawai tu,” terang Menoah.

Menoah madahka sida ngerikod lagu Gawai nya ba Pantai Esplanade Miri pengudah nyau puas betukar endur ngerikod lagu nya.

Sida mega semina ngerikod lagu Gawai nya sehari aja kena 17 April tu tadi tang perambu dini deka ngerikod, sapa ke deka dibai sereta konsep endang udah diperambu tumu ari bulan March tu tadi.

Nambahka nya, Menoah madahka lagu Berimbai Maya Gawai tu ditengkebang laban iya deka ninga lagu Gawai ke ranchak sereta moden nitihka arus pemansang kemaya hari.

Nangkan nya, iya mega madah lagu Gawai sekali tu bebida laban keran deka ngerikod lagu Gawai ke nyelai ari lagu gawai ke udah dipansut bala bukai ngelama tu.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak