Pemujur pekit asil ari sukung mensia mayuh

SARATOK: “Dikelala buah ari langgu, dikelala basa ari mansutka jaku, dikelala adat ari penyiru.”

Nya meh jaku sempama ti suah dikena lebuh ngatur pengawa ngaul adat enggau main asal kitai Iban, ku Tuai Koordinator Pekit Kumang Online 2021 Trofi YB Datuk Ali Biju, Seman Endoi.

Nya alai ku iya, ari penemu baka tu kitai ulih ngemeran lalu ngenanka adat enggau main asal kitai ba dunya ke udah mansang baka diatu.

“Nya meh kebuah kami komiti pekit Kumang Gawai Online 2021 nguji mansutka sekali agi adat enggau main asal kitai Iban nengah chara ngasuh bala pemekit ngaduka video dikena ngayanka kededua budaya asal ba dunya ke baru diatu.

“Pia mega, kami ngatur pekit tu ngena chara siti agi, minta sanding penemu enggau buah runding ari dua iku orang ti bisi penemu senentang adat enggau main asal kitai tu,” terang iya.

Seman madah, buah penemu seduai tu meh nyadika malin enggau lalau bala kami sekumbang ngatur pekit ari renggat milih 100 pemekit nyentuk renggat kepenudi.

Seduai nya Sekretari Majlis Adat Istiadat Negeri Sarawak (Mais), Salang Anak Manjan enggau Personaliti TVS, ti kala ngempu gelar Kumang ba menua Sarawak, Priscilla John.

Berindik ari nya, Seman mai kitai sama meh kitai begempung ngena enggau ngangkatka adat enggau main asal ngambi enda mudah lenyau seriris enggau rambai jaku pekit; Besaup Mekuhka Adat enggau Main Asal Dalam Arus Pemansang.

Iya mega ngarapka semua kitai bela lantang ati nerima pemutus pekit ti udah dibantai ngena chara Facebook Live malam kemari laban undi endang 100 peratus datai ari mensia mayuh.

Ke penerang, Gerempung Bansa Dayak Sarawak (SDNU) Pampang Saratok nyadi pengatur begulai pekit nya.

Walter Sela ke nyadi chairman pampang gerempung nya meri tabi puji enggau pengaga ati ngagai semua pemekit ke udah ngambi bagi lalu ngarapka sida jauh agi singkang udah tu.

Iya mega meransang rayat Saratok anang enggai ngambi bagi lalu ngemujurka Program Betuchuk Vaksin ba pelilih nya nentuka kitai ulih nyapai tagit Imuniti Beraban enggau jampat.

Suara Sarawak