Pengawa meri vaksin ba menua pesisir diatur berurun

MIRI: Pengawa meri vaksin Covid-19 ngagai peranak menua pesisir benung dipejalaika enggau chakah sereta berurun.

Chairman Komiti Penyangga Penusah Nengeri (JPBN) Datuk Amar Douglas Uggah Embas madahka pengawa meri vaksin ninting hari diatu benung diatur ba balai mensia mayuh, sekula enggau klinik pengerai nyengkaum meri vaksin nengah mobil ari Opis Pengerai.

“Program meri vaksin bejalai lanchar enggau mensia mayuh meri timbal ti positif ngagai kangau perintah ti ngasuh sida divaksin.

“Aku berasai gaga meda sida udah sedarka pemadu guna nerima vaksin,” ku iya.

Uggah bejaku munyi nya pengudah ngelawa palan vaksin di Balai Mensia Mayuh Beluru ditu, kemari.
Ku iya, bisi lima buah palan meri vaksin dibuka ba Beluru.

Uggah (kanan) benung meda siku indu misi nuchuk vaksin ngagai siku lelaki di Balai Mensia Mayuh Beluru ditu, kemari.

“Balai mensia mayuh di Beluru tu ulih meri vaksin ngagai 1,000 dos sehari.

“Nya alai, aku ngarapka semua pengari enggau raban tuai ari menua pesisir terus ngelalau peranak sida kelebih agi sida ti agi nangika vaksin awakka mansang kitu ngulihka vaksin,” ku iya.

Iya nandu, vaksin siti ari chara dikena ngelindung diri ari penyakit ti ulih nabanka nyawa Covid-19 nya.
“Semua tu disediaka enggau nadai bebayar ari perintah.

“Sida mega ulih nitihka lalau Kepala Menteri ngambika datai kitu dulu dituchuk udah nya ngerejister diri ba MySejahtera laban gaya tu engkeman agi,” ku iya.

Sama bisi datai Menteri Muda Pengintu Pengelantang Pendiau, Komuniti, Indu, Ruang Bilik enggau Pemansang Anak Mit Rosey Yunus enggau Kaban Parlimen Sibuti Sibuti Lukanisman Awang Sauni.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak