Penyelai sugu tinggi narit ati indu Iban di Holland

KUCHING: Siku pedagang kraf asal ari menua Sibu ngarapka dagang sugu tinggi dipelajar ari aya enggau ini ulih dikelala ba tikas dunya.

Freddy Raymond Louis, 37 taun madah, kebuah pia laban penyelai sugu tinggi keranjai jari iya udah narit ati siku indu Iban ke diatu diau ba menua Holland.

Lebuh nerang bekaul pekara nya, Freddy madahka indu Iban benama Veronica Simba kala meli marik buah puru ba taun 2018.

Iya mega madah, naka diatu produk iya semina nerima peminta ari Sarawak, Sabah enggau Semenanjung Malaysia aja.

Freddy enda nyangka penyelai sugu tinggi digaga iya nerima perati Veronica lalu sanggup meli sugu tinggi nya taja diau jauh di menua tasik.

KERESA KITAI… Entara sugu tinggi ke udah ditembu digaga Freddy.

“Chukup gaga lalu pengudah nerima udar nya, aku gagit deka ngaga sugu tinggi nitihka peminta iya.

“Aku ngepunka dagang tu laban sigi rindu ngaga perengka ngepan kitai Iban.

“Pia mega, rindu amat meda bala pedagang sebelah media rama mantaika keranjai jari sida.

“Pemuas meda sida ngayanka bemacham bansa produk kraf nya, nyau ingin ga asai ati deka ngujika pengelandik dikembuan diri.

“Chukup landik bala pedagang menua tu bedagangka produk kraf asil pemanah keranjai jari sida.

“Ari nya tadi, berunding ga tudah aku, ni nemu penyelai keranjai jari tu ulih narit ati orang bukai, ukai semina ba menua tu tang ulih rembus ngagai menua luar.

“Terubah bedagang suba, ukai semina ngiga untung aja tang keran dekaka perengka dalam ngepan asal kitai tu dikelala sereta diangkat ngagai tikas dunya.

“Sapa agi dikeandal enti ukai kitai ti nampung pengelandik aki ini kitai tu?” ku Freddy.

PUH BELAJAR

Freddy madahka diri temegah ati laban ulih nampung pengelandik aya enggau ini iya.

Nerang silik, iya madahka diri ngebung ba dunya kraf tu kenyau ari taun 2010 berekat sukung sereta jaku peransang ari aya enggau ini iya.

Ku Freddy, sayau amat nyema pengelandik aya enggau ini iya lesap baka nya lalu enda ditampung iya.

Nya kebuah, iya keran deka nampung pengelandik seduai ngambi semampai ditampung sereta enda lenyau ngapa diserunyut arus pemansang dunya.

LIAT ATI… Freddy benung ngetuk sereta ngukir produk iya.

Terang iya, munyi ku sempama, baka rutan tampung danan, baka wi tampung tali, carik kain batik ganti labung pelangi, parai orang ke tuai ganti tubuh kami.

“Nampung baru kenang tadi, aku berengkah ngaga sugu tinggi tu kenyau ari taun 1996 nyentuk diatu.

“Dia mih aku belajar ari ini enggau aya aku. Terubah belajar suba endang pedis amat peda aku tang bai ati keran, pajuka aja mih utai dikerindu tu.

“Salah ukir enggau salah ketuk nya suah amat nyadi tang naka ulih mih aku nangkap utai dipadahka ini enggau aya.

“Nasip amat ga seduai chukup sabar sereta puh amat ngajar dataika aku landik baka ke diatu.

“Tang nyau ke lama belajar, lemi sereta landik agi ga jari tu ngetuk lebuh ngaga ukir ba papan sugu tinggi nya.

“Berekat pengeliat ati ini enggau aya ngajar aku sereta jaku peransang ari apai, indai enggau menyadi, aku udah landik ngetuk sereta ngaga ukir sugu tinggi nya,” ku Freddy madahka pengaga ati iya.

Pia mega ku Freddy, suah mega iya betanya ngagai bala bakih ke lama udah ngemansangka diri ba dunya kraf tu.

Kebuah pia laban iya madahka diri nadai kala nyereta kus tauka eksibisyen mandangka pengelandik ngaga sugu tinggi tang semina kala ngajar bala bukai ba rumah.

Pengawa dikereja Freddy tu endang chukup manah ngambi narit ati bala bukai rinduka pengawa ngaga produk kraf.

Naka diatu, produk pemadu laku dijual iya nya sugu tinggi puchuk lebat, sugu tinggi betaji, buah pauh enggau buah puru.

DAGANG KUSUT

ALUS… Pemanah ukir digaga Freddy mujur narit ati mensia mayuh ngujungka dagang sugu tinggi iya makin laku.

Iya madah, semua kereban dikena ngaga sugu tinggi enggau produk bukai nya dibeli ba kedai hardware, kedai kraf lalu bisi mega diudar iya ari menua luar.

Lebuh ngudar barang diguna ari menua luar, iya madah nyau nganti lama endur barang nya datai kelebih agi maya pandemik Covid-19 tu.

Iya madah, gaya dagang sebedau enggau pengudah pandemik tu jauh bebida ke alai sebedau pandemik suba, iya ulih ngambi mayuh udar.

Taja pia, empas pandemik Covid-19 tu ngujungka Freddy semina ulih ngambi udar nengah online aja laban kedai bejualka produk kraf nadai buka endur nyual produk.

Kebuah pia ku iya, kedai nyual produk kraf mayuh diasuh tutup ketegal pengerekai Covid-19.

Ku Freddy, bekaul enggau untung nya bepanggai ngagai chara kitai bedagang sereta pelasar ngelakuka produk diri.

Nambahka nya, kualiti siti-siti produk mega beguna amat nentuka produk dijual kitai nerima perati mensia mayuh sereta laku.

“Sigi adat kitai bedagang, kadang bisi untung lalu kadang nya bisi rugi sereta pesan aku, anang takut ngereja pengawa tu taja napi mayuh penguji.

“Ba aku, utai tu endang nyadi kelebih agi lebuh napi penguji laban ari penguji nya mih kitai kering agi sereta berundingka chara bukai nentuka kitai ulih beretan ba dunya dagang.

LEBAT… Gaya sugu tinggi ke lebat ke digaga Freddy tu mega dikerindu bala penguna.

“Anang mudah putus pengarap laban mayuh chara kitai ngemansangka dagang diri, enti sema chara tu enggai nyadi tau ga nguji chara bukai.

“Baka diatu, mayuh chara ulih dikena kitai kelebih agi bekenaka teknologi digital ke ulih ngemuntangka genap pengawa sereta mensia mayuh muntang agi meda produk dijual kitai,” ku iya nerang.

Ngelansa silik, Freddy madahka terubah suba iya ngepunka dagang tu ngena puku RM50 lalu untung iya sebulan entara RM1,200 ngagai RM2,000 tang nya bepanggai ngagai pengelaku produk enggau pemayuh udar.

Kelimpah ari sugu tinggi, produk bukai dijual Freddy baka buah pauh, sekang buk buah puru, simpai lelaki enggau indu, tumpa tusun sereta tumpa rakup panjai enggau pandak.

Iya mega bisi nyual pala tumpa, lampit, aksesori tuchuk sanggul, buah puru, sumpin, selampai manik (dujan), sutar (jumpang) enggau sangkum sarang pedang.

RURUN NGAGA SUGU TINGGI

“Nyadi, aku deka nerang pandak aja sentang rurun ngaga sugu tinggi tu ke alai keterubah, nguntin papan sugu enggau belimbing sugu.

“Udah tembu nguntin nya tadi, aku deka ngetuk papan sugu dikena ngaga ukir iya.

“Tembu ngukir, aku lalu ngaga tiang belimbing sugu sebedau dirakup.

“Tembu diguntin enggau dirakup, baru aku ngelekatka jurai sugu lalu kepenudi nya, ngelekat puchuk sugu.

“Timpuh ngaga siti sugu tinggi bepanggai ngagai penyikar siku—siku lalu nitihka pengelebat enggau gaya ukir ba papan sugu tinggi nya,” ku iya nerang silik.

KENANG BEGULAI… Freddy (ujung sekali) begambar ungkup kenang enggau bala pedagang ti betenun kain, manik, sulam, sugu tinggi, nganyam bakul, kain burie enggau ke bukai.

Nangkan nya, Freddy madahka iya ulih nembuka siti sugu tinggi lebat nya pengelama tiga ngagai empat hari aja.

Iya mega madah, semua produk digaga kitai ngembuan penyelai kediri lalu semua ukir produk digaga iya endang bechuanka utai tumbuh bak bungai, daun enggau urat kayu.

Freddy madahka iya suah ngelakuka produk tu ba kedai kraf lalu mega ba sebelah media rama.

Berebak enggau nya, iya madahka diri chukup gaga ati laban bala penguna ti kala meli produk endang tepantup ati sereta gagit amat meda pemanah keranjai jari iya pengudah bala penguna nerima udar.

Naka diatu, Freddy ngelakuka produk iya ba Facebook, Marcus Flaviouss Aquilla Jr enggau mega ba Whatsapp.

KENANG BEGULAI… Freddy (ujung sekali) begambar ungkup kenang enggau bala pedagang ti betenun kain, manik, sulam, sugu tinggi, nganyam bakul, kain burie enggau ke bukai.

“Media rama tu chukup besai guna ba kitai kemaya hari kelebih agi kami ke bedagang laban semua produk dijual ulih dipeda mensia mayuh.

“Kelebih agi maya pandemik tu, endang media rama tu aja mih endur kami bepanggai ngiga anak belanja.

“Ekonomi digital mega ngembuan mayuh pengelebih baka produk dijual pedagang menua bisi pengulih rembus ngagai makit entarabansa,” terang Freddy sentang pengelebih ekonomi digital.

Nya alai, ba pengujung randau dia Freddy madahka bansa kitai Iban patut ngetan sereta angkunka keresa lama baka sugu tinggi ke nyadi kelai ngepan asal kitai Iban.

Freddy mega ngelalau rebak baru anang lembau lalu anang enggai ngetanka pesaka kitai laban sayau amat nyema keresa enggau adat bansa kitai lesap dibai arus pemansang dunya.

 

PUH… Entara kereban dikena ngetuk enggau ngaga ukir ba papan sugu tinggi.

 

DAGANG LAKU… Entara produk bukai ke bisi dijual Freddy kelimpah ari sugu tinggi.

 

Tumpa rakup pandak enggau panjai.

Serebang Melanau


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak