Raban anak seni diperansang nyadi kaban MRSB awakka karya sida dibayar royalti

KUCHING: Semua anak seni ti bekaul dalam industri muzik etnik lebih agi di menua Sarawak diperansang ngaga peminta nyadi kaban Music Right (Sarawak) Berhad (MRSB) awakka muzik ti ditengkebang sida ulih meri penatai pemisi tambah nengah bayar royalti ninting taun lebuh MRSB ditukuka nyadi sebuah komiti belisin ila.

Sebedau tu, Gerempung Armada Anak Seni Sarawak (Aras) nerima perambu Opis Menteri Dagang Dalam Menua enggau Pekara Penguna (KPDNHEP) nyukung penumbuh sebuah komiti belisin ti deka ngempu tanggungpengawa ngumpul chukai (royalti) muzik di Sarawak enggau Sabah.

Dalam siti penerang media kemari perambu numbuhka sebuah komiti belisin tu datai ari Gerempung Komposer Muzik enggau ‘Pembikin’ Video Muzik Sabah (SCORE) ti minta komiti belisin ngumpul royalti muzik khas di Sabah.

Ku penerang nya, siku komposer popular Patrick Kamis lalu mansutka buah runding tu ngujungka pekara nya disukung komposer, penanyi, pemuzik enggau serikat rekoding menua di Sarawak.

Penerang nya mega madahka, entara komiti belisin ti benung beroperasyen di Malaysia naka diatu iya nya Music Authors Copyright Protection (MACP) Berhad, Public Performance Malaysia (PPM) Berhad enggau Recording Performers of Malaysia (RPM).

Empas ari nya, Aras lalu numbuhka MRSB kena 28 September 2020 ke dipilih nyadi sebuah entiti kediri ti deka meri fokus ngagai pengawa ngumpul royalti muzik enggau pengeluar lisin muzik ngagai mensia mayuh di Wilayah Sarawak.

Entara fokus royalti ti digumpul tu iya nya atas lagu etnik menua baka lagu Iban, Bidayuh, Melanau, Kayan, Kenyah, Lunbawang, Selako enggau ke bukai.

Tandu penerang nya, MRSB udah ngaga peminta nyadi sebuah komiti belisin ti sama megai tanggungpengawa baka MACP, PPM enggau RPM ngagai Perbadanan Harta Intelek (MyIPO) ba bulan Disember taun siti tu tadi.

Ba program webinar ti diatur Wisdom Foundation Sabah kena 15 June apin lama, Menteri KPDNHEP Datuk Seri Alexander Nanta Linggi madahka iya nyukung penumbuh komiti belisin tu.

Penerang nya madahka, sida tau ngelawa facebook Aras enggau facebook MRSB tauka betelefon ngagai Lewelyn Lawas Julin ba lumur 014-6175018 maya opis tebuka.

Suara Sarawak