Ray Lee enda nyadang dipilih masuk sekula filem tebilang di dunya

KUCHING: Direktor filem Belaban Hidup : Infeksi Zombie Ray Lee udah dipilih nyadi mentee (penyereta) ba Bucheon International Fantastic Film School (Bifan).

Lebuh dirandau Suara Sarawak, Ray madahka diri berasai temegah laban dipilih nyadi penyereta begulai enggau 34 iku orang bukai ari serata dunya.

“Chukup temegah ati lalu enda nyangka nama aku dipilih nyadi siku ari mentee laban Bifan nya entara sekula filem fantastik pemadu besai sereta tebilang di dunya.

“Kebuah pia laban sida tu ‘anda’ ba pengawa matih direktor filem lebuh mansutka filem berantu.

“Temegah, gagit sereta enda ngadang lebuh aku siku aja direktor filem ari Malaysia dalam pengawa tu begulai enggau mentee ba serata dunya.

NGARIKA MALAYSIA… Ray Lee entara 35 iku mentee ba Bifan.

“Puji Tuhan laban udah diberi peluang ke chukup besai tu sereta bulih mentor ari produser filem tikas entarabansa.
“Entara produser filem tebilang tu iya nya Jonathan Kim, Todd Brown, Kim Wonkuk, Alexandre O. PHILIPPE, Michele Son, Evrim ERSOY, Kerry Deignan ROY, Tony Kaye.

“Semua produser filem nya kala mansutka filem besai baka The Exocist, Gonjiam-Haunted Assylum, The Outlaw enggau ke bukai,” ku iya.

Menua bukai ti sama bisi masuk Bifan sama enggau Ray Lee iya nya pengari ari menua Mongolia, USA, Vietnam, Singapore, Ecuador, Israel, India, Indonesia, Jipun, China, Taiwan, Philiphines enggau ke bukai.

Ray Lee, 44 taun sebedau tu kala menang mayuh anugerah, tu nyengkaum Anugerah Sinematografi Asia di Philiphines enggau Karnival Filem Dunya Singapore nengah Filem Belaban Hidup.

Filem Belaban Hidup-Infeksi Zombie udah dipilih nyadi ‘official selection’ ba Pengerami Entarabansa Filem Berantu Rusia.
Ungkup penerang semua, siti pengerami filem berantu pemadu besai beumur 11 taun di Rusia.

Pia mega, Pengerami Filem Berantu Entarabansa Macabro, Mexico mega pengerami filem berantu pemadu besai di Amerika Selatan beumur 20 taun ti disukung Opis Menteri Main Asal Mexico.

Ku iya, Filem Belaban Hidup tu pengelama lima hari kena 25 ngagai 29 Ogos tu di Moscow.

Ray Lee mega temegah ati laban apin lama ke udah, filem nya dipilih nyadi ‘Official Selection’ di Pengerami Filem iHollywood enggau Pengerami Filem Nashville TCK.

Sebedau tu, Filem Belaban Hidup kala dipandang pengelama tiga hari beserimbai enggau Pengerami Gawai Dayak kena 28 ngagai 30 Mei tu tadi di Sweden, Australia, New Zealand enggau United State (US).

Bifan ti dipejalaika Network of Asian Fantastic Films (NAFF) nya program matih bekaul filem berantu keterubah di dunya.

Nitihka penerang ari Bifan ba website iya, program ke 25 nya diatur kena 8 ngagai 14 Julai tu nengah online ketegal pengerekai Covid-19.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak