SDNU Saratok mai begempung nyukung program ti ngidupka adat Dayak

SARATOK: Semua raban bansa Dayak dilalau terus begempung sereta besukung nengah program ke bisi diatur bekaul enggau pengawa ngerembaika adat bansa Dayak.

Nya alai, Gerempung Bansa Dayak Sarawak (SDNU) Pampang Saratok berasai gagit laban ulih nyadi pengatur begulai Pekit Kumang Gawai Online 2021 Trofi YB Datuk Ali Biju.

Chairman iya, Alexander Sela madahka sida enggau baruh ati chukup gaga ati ulih bekerejasama enggau Kaban Parlimen Saratok, Datuk Ali Biju empu ngatur pekit nengah online nipakka chara idup baru kitai diatu.

Ku iya, pengawa enggau tuju ke manah pekit nya endang patut disukung ngambi meri penguntung enggau pemaik kaul rayat pupu bansa menua tu.

“Ngatur pengawa nengah online tu nyau nyadi budaya seriris enggau daya idup chara baru ba idup kitai kelebih agi sekumbang menua dituntung pandemik Covid-19.

“Nya alai aku ngarapka semua kitai ulih meri sukung, buai dulu semua peragam enda manah laban semua nya tau mai pengerugi enggau penyarut.

“Ni daya chara ulih dikena kitai ngerichahka Gawai Dayak chara baru laban kasihka bala pemekit enggau pengatur pekit udah ransing ati,” ku iya lebuh dirandau Suara Sarawak.

Sela mega meri tabi puji enggau pengaga ngagai 50 iku pemekit pemadu mayuh undi ti udah dibantai ba laman Facebook rasmi Ali Biju empu, ensana.

“Ngarapka semua pemekit ulih bepekit enggau ati lurus sereta teulihka pemujur lalu nerima pemutus enggau ati lantang.

“Bepekit meh nitihka rambai jaku pekit kitai; Besaup Mekuhka Adat Enggau Main Asal Dalam Arus Pemansang, laban enti kitai bisi Adat, kitai deka bisi basa ngagai pangan diri,” ku iya madah nyemetak.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak