Sinu ati begawai puang

SARATOK: Pengerami Hari Gawai Dayak taun 2021 deka semampai dikenang semua bansa Dayak lebih ba rumah panjai Emplaie Ulu ditu.

Tuai Rumah (Tr) Gending Danggat madah tu berindik ari Atur Mindah Betagang (PKP) ti dipejalaika perintah ketegal nagang pengerekai Covid 19.

Nya alai, semua pengawa begelumu bebala mayuh di rumah panjai sigi enda disagi kelimpah sida ke gawa di mengeri enda diasuh pulai ke menua.

“Taun tu terubah iya kami sekayu rumah ditu nadai ngatur sebarang program Gawai Dayak nyengkaum begelumu bebala mayuh ba ruai maya ngirup ai pengayu enggau ngalu petara.

“Atur PKP tu endang berasai nyelai laban nadai ulih berami baka selama kenyau 75 taun ke udah kenyau pengudah rumah panjai tu dientak ba taun 1946,” ku iya maya dirandau Suara Sarawak.

Tr. Gending Danggat.

Nangkan nya, Tr Gending madah diri berasai sinu ngenang kaban belayan bala anak menantu ti gawa ba menua bukai enda ulih pulai sama berami dirumah panjai baka taun ke udah.

“Tang nadai daya laban atur ti udah ditetapka perintah mesti dititih ambika pemaik semua,”ku iya.

Taja pia iya madah diri tetap besampi lalu ngarapka nadai sebarang kluster nyadi pengudah pengerami Gawai Dayak tu.

“Selamat Hari Gawai Dayak ngagai semua bansa Dayak enda ngira dini alai diau lebih agi nuju kami serumah ti enda ulih pulai sama berami taun tu ngarapka semampai nitihka SOP enggau nyaga pengerai diri empu enggau diri sebilik.

“Pia mega arapka Covid 19 jampat punas ngambi kitai ulih diau likun baka selama lalu ulih sama berami ba taun dudi,”ku iya.

GAWAI SUBA…Gambar kenang aktiviti Gawai Dayak taun 2019 suba iya nya bejalai beraban ngelaluka Petara ba Rumah Panjai Empelaie Ulu, Saratok.

Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak