Tiga kluster baru nambah di Sarawak

KUCHING: Bisi tiga kluster baru dirikodka kemari iya nya Kluster Mongkos 2, Tebedu, Kluster Tebakang Dayak, Serian enggau Kluster Sungai Banun, Meradong.

Komiti Penyangga Penusah Nengeri (JPBN) dalam siti penerang media kemari madahka, Kluster Mongkos 2 ngaul sebuah komuniti di Kampung Mongkos, Tebedu ti bepun ari pemindah rama ti ngujungka kes berampit diri sebilik.

Penerang nya madahka, tu kedua kali kluster ayan ba palan ti sama pengudah kluster keterubah diaku punas kena 14 June tu tadi.

Kelimpah ari nya, Kluster Tebakang Dayak mega ngaul sebuah komuniti di zon Ntagen Asai Kampung Tebakang Dayak, Serian ti ngujungka 18 iku ditemu positif Covid-19.

Kluster kepenudi iya nya Kluster Sungai Banun mega ngaul sebuah komuniti di sebuah rumah panjai ke benung bejalaika Atur Mindah Betagang Bepekul (PKPD).

Kluster tu berampit berindik ari kaul rama enggau orang ti bekaul ba dalam rumah panjai nya.
Taja pia, bisi siti kluster dirikodka punas kemari iya nya Kluster Nanga Tajam, Selangau laban nadai ngerikodka kes positif Covid-19 baru dalam timpuh 28 hari.

Ba pekara bukai, penerang nya madahka bisi empat buah palan deka bejalaika PKPD nangkan tu.
Empat buah palan tu iya nya Kuarters Pengereja Chicwan Batu 5, Bintulu (18 June nyentuk 1 Julai), Rumah Peter Suring, Sg Silas Tabau, Jalan Ulu Sebauh, Bintulu (18 June nyentuk 1 Julai), Rumah Inchang, Skirau Ai, Tanjung Bijat, Sri Aman (19 June nyentuk 2 Julai) enggau Rumah Legi Lubok Kawi, Kabo Saratok (20 June nyentuk 3 Julai).


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak