Tikas gaji ‘fresh graduet’ patut diperati baru

KUCHING: Perintah patut meratika enggau dalam agi penanggul ti nyadi dalam makit orang gawa di Malaysia kelebih agi bekaul gaji nembiak baru apus belajar ba universiti tauka ‘fresh graduate’.

Felo Akademik Sains Malaysia Datuk Dr. Madeline Berma madahka, pansik nunjukka majoriti nembiak ke baru tembu sekula universiti bulih gaji urung RM1,001 nyentuk RM1,500 ba taun 2020.

Ku iya, ba menua tu penatai pemisi tikas penyeranta iya nya ba RM2,208 sebulan.

“Tu mai reti, majoriti ari nembiak nya nerima penatai pemisi ba baruh tikas penyeranta,” ku iya bejaku ngagai Suara Sarawak, kemari.

Ngelansa dalam agi, iya madahka pekara tu ngait rat enggau ‘skill-related underemployment’, iya nya mayuh ari sida gawa dalam pengawa ba baruh tikas akademik.

“Nya alai, sekeda pekara patut digaga dikena mutarka penanggul sistematik tu ba makit orang gawa,” ku iya.

Ungkup rikod, Opis Perangkaan Malaysia apin lama madahka bisi trend nurun ti balat nyemetak nyadi ngagai tikas upah nembiak baru tembu sekula universiti ba taun 2020 enti dibanding enggau taun sebedau nya.

Nya nunjukka tikas upah labuh ari RM2,001 nyentuk RM2,500 ba taun 2019 ngagai RM1,001 nyentuk RM1,500 ba taun siti tu tadi.

Kelimpah ari nya, pangka Covid-19 mega entara kebuah pekara tu nyadi lebuh ekonomi menua labuh ngagai tikas 5.6 peratus taun siti tu tadi, ti nandaka aktiviti ekonomi enggau dagang nadai ngerembai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak