Tubuh niang Nyawai ditemu enda jauh ari endur iya labuh

JULAU: Tubuh orang tuai diripot lenyau pengudah labuh lebuh deka nepan perau Hari Minggu nyin tadi udah ditemu tadi.

Tuai Balai Bomba dan Penyelamat (BBP) Bintangor, PPgB Nicholas Belulin madahka tubuh niang Nyawai Guntor, 75 taun, ditemu urung 15 pejalai ari endur iya labuh di Ulu Mujok.

Ku iya, empat raban betuaika Komander Operasyen, PBKII Mohd Khairul Adeni Bahgia berumban ngesah ngagai endur penusah nyadi pengudah nerima penerang pasa pekara nya.

“Tubuh niang udah nya diserah ngagai raban polis ungkup pansik bukai,” ku iya lebuh dirandau.

Belulin madah, operasyen ngiga enggau nyelamat (SAR) diketu tekala nya pengudah tubuh niang ditemu.

Ba penusah nyadi Hari Minggu nyin tadi, niang dipelaba ba rantau jalai mansang ke kebun ari pengkalan Rumah Gerasi sebedau ngerantar lalu labuh ke sungai.

Berindik ari nya, peranak dia bekerejasama enggau raban polis ngelancharka SAR tang puntan tetemuka niang.

Suara Sarawak