Vaksin mantu tubuh kering ngelaban penyakit

KUCHING: Peragam penemu mensia mayuh ngumbai diri udah nerima vaksin deka kebal ari Covid-19 kebendar enda betul, ku Datuk Sri Dr Sim Kui Hian.

Menteri Kaunsil Kandang Menua enggau Pengawa Berumah nya madah, peragam penemu ke munyi nya kebendar enda betul tauka saru taja sida udah dua kali nerima tuchuk vaksin tang agi ulih kena rampit Covid-19.

“Mayuh orang nanya ngagai aku nama kebuah orang agi ulih dirampit Covid-19 taja udah dua kali nerima tuchuk vaksin.

“Dua dos vaksin kebendar iya dikena nentuka tubuh kitai kering ngelaban penyakit.

“Tu mih kebuah taja udah nerima dua dos vaksin, tang tama Sarawak kita deka diasuh mesti kuarantin 14 hari,” ku iya ba laman Facebook rasmi iya.

Iya madah munyi nya lebuh nyaut tanya mensia mayuh pasal Menteri Kanan Kereja Raya Datuk Seri Fadillah Yusof diripotka kena rampit Covid-19 kena Hari Lima.

Ku iya, tuju ke pemadu beguna vaksin nya nagang kitai ari kena rampit sumbuk penyakit baru.

“Sumbuk penyakit tu ngujungka sekeda vaksin Covid-19 nyau nyadi kurang ngasi, nya alai beguna amat vaksin tu diberi jampat.

“Penerima vaksin agi ulih kena rampit, tang penyadi ke rayat ba sida nyangka kurang dibanding enggau orang ke apin divaksin.

“Tuju vaksin ukai kena nagang diri ari kena rampit. Tu salah. Vaksin nya kebendar awakka kitai ngembuan tubuh ke kering ngelaban penyakiti, sakit enda raya,” ku iya.

Tandu iya, vaksin pemadu manah nengah 95 peratus reti nya ari 100 iku ke nerima tuchuk, semina 95 iku bisi antibodi.

“Ngagai sida ke agi nangi nerima vaksin enggau enggai divaksinasi, kita nadai utai ngarung,” ku iya.

Berebak enggau nya, Dr Sim Palan Meri Vaksin (PPV) Kozi Square endang nyaup PPV Sepital Besai Sarawak (HUS) lalu sida bejalika pengawa meri tuchuk 2,000 iku sehari.


Dapatkan kandungan menarik di media sosial kami:  Facebookk | Tiktok | InstagramYoutubee Twitter |
 
!Peringatan! Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak