Bantu barang pemakai disadung berenggat

SARATOK: Urung 210 bantu pemakai Bakul Prihatin Negara udah diagih ngagai tiga sitak Dun dipegai sitak Parlimen Saratok.

Nitihka penerang ari Opis Pengintu Pengelantang Mensia Mayuh (JKM) ditu, tiga sitak nya bela nerima 70 tungkus pemakai nengah program dipejalaika opis nya.

Rintai penerima ari sitak Dun Krian, Kalaka enggau Kabong deka nitihka sida ti udah nganjung peminta ti udah dibuka kenyau ari 19 Julai nyin tadi.

Raban ari Palan Servis Komuniti P205 Saratok nyaup raban JKM ngagihka bantu pemakai nya ngagai sekeda genturung pendiau nitihka rintai peminta diterima.

“Kami nganjung bantu ngagai bala penerima nitihka rintai nama ti diberi raban JKM, nya kebuah pengawa dipejalai berenggat.
“Kami udah nganjung bantu ngagai anembiak Rumah Rabiah Kandau di Sungai Ara ensanus,” ku pengari ari palan servis nya lebuh dirandau Suara Sarawak.

Berebak enggau nya, Kaban Parlimen Saratok ke mega Adun Krian, Datuk Ali Biju meri terima kasih ngagai Perintah Besai kelebih agi KPWKM ti udah ngampitka bantu ngagai rayat menua tu.

“Terima kasih ke penyiru semua raban ti udah sama gerah jari enggau lempung tulang ngemujurka pejalai program ngagihka bantu baka tu ungkup pengelantang rayat.

“Tabi puji mega ke pengiruh raban ti udah bebendar gawa baka sida ari JKM enggau Palan Servis Komuniti ditu.

“Arapka bantu tu meri pengelantang enggau ngelempungka mimit tating belanja bala penerima ti benung tusah diatu. Sama nyaga pengerai diri empu,” ku Ali.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak