Raban Eagle Crown seruran enda langkang penemu nempa lagu nyelai

KUCHING: Raban penanyi biak ke ngela diri Eagle Crown deka mansutka sebuah agi lagu baru dipadah bisi penyelai mimit ari lagu-lagu sida sebedau tu laban ngundan leka sampi nyembah Petara.

Nitihka penerang ari penengkebang lagu tu, Uncle Lih Achop madahka kebendar leka penuh lagu tu endang bepelasarka jaku besilup suru Iban dalam ti engkeman sereta chulin.

“Serak tu, taja iya (lagu nya) bisi ngerintaika jaku main asal Iban tang iya mega diselitka enggau leka sampi nyembah Petara.

Victoria Eagle Crown

“Sekeda ari genteran lagu nya munyi tu ; Pangka bena pasang raya, Tekerap rentap tusur dinding tebing,
Anchur runtuh pasir rata, Ribut bepuput biau balai, Ngeransi kudi aku telempai, Rebah nyembah tanah landai, Iring tawing aku niti neraja, Andau lalau aku ngelayang dunya,” ku iya.

Uncle Lih ke mega siku ari lemambang penengkebang leka Pelandai ba Ruai, Suara Sarawak mansutka pekara nya bekaul enggau berita pemerindang pemadu baru ari raban Eagle Crown.

Nangkan ke nya, ku iya kebuah leka lagu nya ditengkebang munyi nya laban selalu bepelasarka pendiau pengidup kitai mensia di dunya nyata.

“Bechuanka iya ti kala dipeda enggau pengasai iya empu. Nya alai iya enda ulih diakulka ngapa. Baka cherita dalam lagu Ngeleda tu, iya ditampung tauka tusi siku orang ti beempu sebana dalam lagu.

Ngelansa timbal ari raban Eagle Crown mega bekaul enggau pengasai sida maya nyadaka lagu tu, ti besulamka jaku belangkung karung Iban dalam.

Dia ketuai raban tu, Victoria Umang madah tu meh lagu ti pemadu pedis disada ari lagu ke udah-udah.

Amel Eagle Crown

“Tu beduduk ari Uncle Lih Achop enggai ninga leka disebut enda engkeman, sereta mega patah nyawa nyadaka siti-siti genteran enda tau enda nitihka pengasai sebana dalam cheritu tu.

Dee Nang Eagle Crown

“Tambah mega leka jaku ti dikena ditu selalu berubah, lebuh dilah kami selalu bebelit nyebut leka jaku ti enda kala didinga kitai ke rebak baru. Enggai ke enda manding disebut enggau rintai jaku ti enda berurun sereta nyengkalan.

“Nyadi, nya mih kebuah lagu Ngeleda tu dirikot nyau sehari suntuk dalam kandang seminggu nadai belanggang hari.

“Taja pia, pengujung iya Puji Tuhan, kami sebuat bulih ga pemujur ke ngemuaska ati ketuai kami, penusun tiun enggau penengkebang leka,” ku iya.

Pia mega, Victoria madah asil pengeliat ati sida seraban ari Sarikat TJKSB Music Production dia lagu Ngelada ulih tembu nitihka peneka lalu disadang ulih didinga peninga ba radio enggau youtube enda lama agi.

Nya alai, arapka bala peninga enda leju ninga lagu ari Eagle Crown sereta ulih nyagam empas cherita dalam lagu tu enggau engkeman, ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak