407 kes positif baru nambah di Sarawak

KUCHING: Kes positif Covid-19 di Sarawak kemari nambah baru ngagai 407 kes , ngujungka penyampau kes positif di menua tu nambah ngagai 73,986 kes.

Komiti Penyangga Penusah Nengeri (JPBN) dalam siti penerang media madahka Pelilih Menua Kuching terus ngerikodka kes pemadu tinggi iya nya 198 kes.

Ku penerang tu, pelilih menua bukai nangkan ke Kuching iya nya Serian (38 kes), Samarahan (34 kes), Sibu (23 kes), Bintulu (17 kes) enggau ke bukai.

Nangkan ke nya, bisi dua kes pemati baru dirikodka kemari ba Pelilih Menua Sibu.

Ku penerang tu, seduai ti midang nya bela lelaki beumur 59 enggau 60 taun.

Pia mega, dua kluster di Kuching iya nya Kluster Kampung Muara Tebas enggau Kluster Stampin udah ditukuka punas laban nadai ngerikodka kes baru dalam timpuh 28 hari.

Suara Sarawak