758 kaban PBT disambung servis

KUCHING: Sepenyampau 758 kaban Opis Kaunsil Kandang Menua (PBT) Sarawak dichiri enggau mangku tanggungpengawa nya berengkah 1 Julai 2021 nyentuk 30 June 2022.

Menteri Kandang Menua enggau Pengawa Berumah Datuk Seri Dr Sim Kui Hian madahka, iya ngarapka timpuh servis kaban PBT ti dilanjarka tu ulih megai tanggungpengawa enggau manah.

“Pekara tu beguna dikena nentuka servis ulih datai ngagai rayat kelebih agi kuasa ba baruh PBT.

“Servis lengkas ti diberi raban opis bekaul enggau penanggul komuniti nyadi cheremin pemereti kitai ngagai isu ti ayan kelebih agi sentang servis,” ku iya.

Kui Hian bejaku munyi nya berserimbai enggau Pengawa Angkat Sumpah Nyirika Baru Kaban Kaunsil PBT Sarawak ti dikemataka Kepala Menteri Datuk Patinggi Abang Johari Tun Openg nengah chara online, kemari.

Ku iya, kaban PBT megai tanggungpengawa ti besai nyadi pengari ejensi enggau raban terabai Perintah Sarawak dalam bejalaika pelasar perintah ngagai mensia mayuh.

“Sida mesti ngembuan ulah integriti tinggi, siru, profesional dalam sebuah tim enggau ke bukai.

“Sida mega patut nyeliahka pekara ti tau ngeruga imej opis ke alai sida dilalau nyeliahka diri ngaul diri dalam dagang,” ku iya.

Iya mega madahka, kaban opis tu patut meri basa ngagai pendiau perintah dalam bejalaika pengawa enggau bebasaka pelasar ‘Tanggungjawab Kolektif’ endur semua pemutus ti digaga nyadi sebuah komiti tauka entiti.

“Nyadi pengari genturung pendiau sida mesti nemu nama pekara ti nyadi bekaul servis ari ejensi nya.

“Semua pelasar mesti dipadah nyentuk ngagai mensia mayuh nengah kaul tauka randau berenggat awakka tikas servis berkualiti,” ku iya.

Ba pekara bukai, Kui Hian madahka jam diatu PBT napi pemar laban diaku nyadi sebuah ejensi raban terabai menua ngelaban pengerekai Covid-19.

“Nya alai, aku meri terima kasih ngagai 26 PBT di Sarawak nyengkaum Dewan Bandaraya Kuching Utara (DBKU) enggau Kaunsil Pemansang Bintulu (BDA) ti udah chakah ngelaban Covid-19.

“Aku pechaya enti kitai beserakup sereta bekerejasama nyadi sebuah raban, nengah program meri vaksin ti chakah, kitai deka menang enggau mujur ngelindung Sarawak,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak