Bantu endang dianjung ngagai rumah panjai PKPD

SARATOK: Rayat rumah panjai ti diasuh nitihka Atur Mindah Betagang Dipekul (PKPD) endang bisi diberi bantu nitihka pematut, ku Datuk Ali Biju.

Sapit Menteri Pengeluar Kuasa enggau Pengeraja Asal nya madahka rayat anang saru penemu enti sida nadai nerima bantu baka sebedau tu.

Ku iya, raban ba Palan Servis Komuniti Sitak Parlimen Saratok diatu meri fokus nganjung bantu ngagai rumah panjai tauka genturung pendiau ti diasuh bepekul.

“Ari nya, aku arapka rayat mayuh meretika penusah besai ditapi kitai diatu kelebih agi ba pengawa ngagihka bantu ti benung chakah dipejalai diatu.

“Ukai reti pengelantang bala bukai diteju tang kitai berundingka sida tu lebih begunaka bantu laban enda ulih mindah berindik ari atur diterit dipejalai dia.

“Nya kebuah kami meri bantu ngagai sida dulu, abis nadai sida enda suntuk pemakai sekumbang ke diau jenuh ba rumah,” ku iya lebuh dirandau Suara Sarawak.

Ali ke mega Kaban Parlimen Saratok madah, naka 2 Julai tu tadi bisi tujuh buah rumah panjai bejalaika Atur Mindah Betagang Penuh ketegal bisi kes Covid-19 berampit dia lalu dikena nagang igi penyakit nya ngerampit orang bukai.

Sida ti bepekul diatu iya nya rayat Rumah Ajong, Tembawai Pok, Sebetan, Rumah Unchie, Nanga Ingu, Kabo, Rumah Edwin Nyelang, Batu 4, Sebetan, Rumah Millai, Emplaie Ili, Rumah Gending, Emplaie Ulu, Rumah Chenggie, Brayang enggau Rumah Mang, Sungai Wong, Brayang.

Berita penuh Ruai 8 pagila.

Suara Sarawak