Beri peluang gawa ngagai sida ke baru nembuka pelajar

KUCHING: Raban pengemeran kunteriktor dilalau meri peluang ngagai nembiak rebak baru tembu belajar ba universiti tauka peranak menua tu empu gawa ba palan projek.

Menteri Muda Infrastruktur enggau Pemansang Penyangkai Kapal Datuk Julaihi Narawi madahka pekara tu beguna ngagai menua laban begunaka penau teknikal ungkup jemah ila.

“Kelimpah Atur Mindah Betagang (PKP), entara pemar bukai ke ditapi raban kunteriktor iya nya penyampau pengereja pengawa ba palan projek.

“Kebuah pia, laban raban tu ti diguna ungkup ngelancharka enggau nembuka semua pengawa ba palan projek,” ku iya.

Julaihi bejaku munyi nya lebuh ngabas Projek Jematan Batang Rambungan ditu, kemari.

Ku iya, nyendiaka raban pengereja pengawa ngagai penau teknikal amat beguna kelebih agi nembiak ti baru tembu belajar universiti.

“Nya deka meri pemaik ngagai kitai laban enti sida udah dilatih nyentuk, sida ulih diambi gawa ba projek bukai nangkan ke tu,” ku iya.

Tandu iya, di Projek Jematan Batang Rambungan bisi 15 iku rayat menua enggau 16 iku rayat menua China diambi gawa dalam projek nya ungkup besilih penau enggau pekara teknologi.

Ku iya, kaul penau ari menua luar ulih ngemansangka penemu pengereja pengawa menua tu empu.

“Kitai begunaka silih teknologi baru sereta penau sida ti endang udah teleba dalam pekara tu.

“Nya alai, aku ngelalau raban kunteriktor ngambi enda ninggalka pengereja pengawa menua tu empu lebuh ngatur projek baka injinir di Sarawak,” ku iya.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak