Bida muzik popular enggau pop

Agi mayuh peminat muzik di menua tu saru sentang bida leka jaku muzik popular enggau muzik pop. Ba bidang muzik bisi dua leka jaku tu sigi bisi bida lalu bisi skop enggau penteba kediri.

Berebak enggau, pengari Ruai bekunsika randau enggau Sekretari Gerempung Anak Seni Iban Malaysia (Pasima) ke mega siku penanyi, Isa Lee.

RUAI : Tabi kaban, baka ni ba penemu nuan bekaul enggau isu peminat dunya pemerindang ti agi saru tauka apin tentu nemu bida entara muzik popular enggau muzik pop?

ISA LEE : Terima kasih laban udah ngangau lalu mai aku bejuraika isu tu. Pekara tu sigi amat nyadi. Agi mayuh bala kitai bedau nemu bida entara kategori muzik dua bengkah tu.

Kebuah pia laban ba pikir enggau runding sida ngelama tu asal lagu nya pegari lalu otomatik mih dikumbai popular. Nya sigi amat laban sigi logik.

Nama bida muzik dua bengkah tu tuan?

ISA LEE

Au…nyadi muzik popular tu nya siti leka jaku generik ke lalu nyadi penteba spesifik dikena ngelai tauka mida sesebengkah genre muzik ti bisi dalam dunya tu.

Nyadi ba kontek industri muzik, muzik popular tu nya sebengkah muzik ti ditemu ulih narit ati tauka sera mayuh orang.

Dalam muzik popular tu bisi mega ngundan genre ke bukai lalu skop iya mega besai agi ari muzik pop.
Reti iya, muzik pop tu siti kategori dalam muzik popular.

Siti pengelebih muzik popular iya nya iya ulih nyungkak pengerindu mensia mayuh ba industri pemerindang di dunya tu.

Muzik popular udah sinonim tauka bekait enggau muzik entarabansa baka rock, pop enggau muzik dikena betanda lalu populariti semua muzik tu suah agi bepanggai ba gaya sambut peminat ti diau di mengeri.

Baka ni gaya muzik ti dikumbai muzik pop tuan?

Muzik pop tu bebida ari muzik popular taja kekadang mayuh orang ngumbai iya sebaka. Muzik pop tu siti genre muzik ti beguna dalam muzik popular lalu iya bisi gaya spesifik ti fleksibel ke alai melodi bisi mudah dilaguka kitai.

Nambahka nya genteran, rangkap enggau korus iya suah ditandu maya belagu. Entara chunto muzik pop tu iya nya lagu berentak rock lubah enggau pop rock.

Chara bukai dikena ngelala enggau mida iya nya muzik tu seruran nerima sambut ti manah ari peminat kelimpah suah dipasukka ba charta lagu.

Chunto lagu ke dikumbai muzik pop tu nya Cinta Adam Dan Hawa (Misha Omar), Dan Sebenarnya (Yuna), Sedetik Lebih (Anuar Zain), Patah Seribu (Shila Hamzah), Lelaki ( Yuna Zarai), Sesal Separuh Nyawa (Aliyah) enggau mayuh agi ke bukai.

Manah endar penerang nya tuan. Limpang mimit ari batang randau tua. Nama penemu nuan bekaul enggau jaku (komen) dipansutka siku peminat ke meri komen ba chanel Youtube nuan sentang lagu Enda Disadang ti madahka lagu nya lagu ngining orang indu?

Ba siti-siti lagu tauka muzik ti ditengkebang tetap bisi komen ari peminat. Komen nya beguna magang baik nya komen positif tauka komen negatif lalu genap komposer tauka penulis lirik mesti muka runding sereta besedia sebarang penemu ari peminat di luar din. Semua komen diambi nyadi utai ti positif dikena ngemaju sereta ngemadaska agi lagu ke dudi hari ila.

BAKA PEMAKAI KE MAYUH ASAI

Penanyi lagu popular Enda Disadang.

Kati manah tauka enda enti lagu tauka muzik nya mayuh nerima komen ari peminat?

Ba aku, mayuh agi orang ti komen lagu kitai nya mandang sereta nunjukka lagu tauka muzik nya bisi empas ba ati sida. Lagu nya datai ba ati sida lalu kebuah sida sanggup meri awak komen lagu nya. Nya tanda sida ibuh. Taja pia seliahka mih komen ti ‘too personal’ (ngemalu orang) laban nya tau ngemaruhka pendiau penanyi nya.

Ambika banding ba lagu Enda Disadang ke diayan ba Youtube, ari lebih 600 iku peminat ti bisi mantaika komen sida lalu bisi siku semina siku ti madahka lagu nya lagu ngining orang indu.

Kati bisi nuan nyima pengudah macha komen ari peminat ti baka nya?

Mimit pan nadai mih aku nyima. Anang ke nyima tang nyau ngasuh aku ketawa sereta geli ati lalu nganggap nya semina bungah ‘manchal’ ari peminat. Munyi ku aku ari atas tadi semua penemu ari peminat diguna magang.

Kitai patut merati enggau manah sereta silik ari semua sukut nama kebuah peminat meri penemu ke baka nya lalu iya ke pemadu beguna kitai anang jampat ngeransi.

Ambi banding enti siti-siti watak ti dilakunka dalam drama ba televisyen nya suah dikejakuka bala peminat drama, reti nya drama nya pemadu manah laban ulih ninggalka empas dalam ati sida ti meda.

Baka ni gaya leka lagu ti semitan tauka iya ke ulih narit ati peminat?

Lirik ti badas iya nya lirik ti ulih nyeritaka cherita dalam lagu enggau chara ti mudah. Peminat siti-siti lagu deka puas ati enti sida mereti cherita dalam nya.

Lagu Enda Disadang mega ditengkebang bepelasarka peneleba ke suah dipeda nyadi entara siku lelaki enggau siku indu. Utai ke nyadi mayuh agi enda disadang tang tau nyadi.

Terima kasih dikena ngujungka randau, nama pesan nuju peminat?

Aku chukup beterima kasih ngagai semua ti semampai nyukung aku ngelamatu. Terima kasih bala DJ radio, raban pemberita lebih agi kaban Facebook ti selalu nyukung.

Anang leju au mantaika sukung kita lalu enti kita manah ati tau subscribe chanel youtube aku Hello i laban mih semua lagu aku enggau cherita aku ke bukai.

Anang irauka pasal komen ti machal laban nya mih tanda pengaga enggau pengiruh peminat pengudah sida ninga lagu nya.

Kekadang bisi lirik lagu ti tau kena kitai betundi lalu bisi mega ngasuh ati iran enda sesalah baka utai diempa ti ngembuan bemacham asai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak