Dua PPV di ulu Baram kena bah tunggal

MIRI: Penusah bah ba ulu Baram udah nekul Program Betuchuk Vaksin Covid-19 Nasional (PICK) beduduk ari peranak enda ulih datai ngagai Palan Meri Vaksin (PPV) Klinik Long Lama enggau Long Jegan.

Komiti Penyangga Penusah Bagi Menua (JPBB) Miri ba sebengkah penerang tadi madah, ujan bangat kenyau Hari satu tu tadi ngujungka PPV nya ampuh bah.

“Opis Pengerai Bagi Menua Miri madahka pengawa meri vaksin di PPV nya ditangguh dulu nyentuk haribulan baru dipadah,” terang iya.

Pia mega, PPV Klinik di Mulu ke ditangguh sebedau tu beduduk ari kandang menua nya bah udah dibuka baru.

“Ba PPV Klinik Long Loyang, peranak ulih ngena perau ngagai PPV ngambi nerima vaksin.

Nangkan nya, klinik bukai ba menua ulu diperambu meri vaksin kena Hari Enam tu lalu pekara tu deka diperati baru ba klinik nya ila,” terang JPBB Miri.

Ba lansa bukai, pengawa nganjung vaksin dipejalai Opis Pengerai Bagi Menua Miri disaup Opis Bomba enggau Penyah Penusah Malaysia (JBPM) tetap dipejalai baka ke udah diperambu taja penusah bah nyadi di Long Jegan.

“Vaksin nya dianjung ngena bilun bansa AW139 bepengkalan di Miri enggau udah datai ba sekeda endur di ulu Baram nyengkaum di Long Jegan, pagi kemari,” ku penerang nya.

Kelimpah ari nya, JPBB Miri minta mensia mayuh semampai bejejaga enggau nitihka Atur Pengawa Standard (SOP) dikena nagang igi penyakit Covid-19.

Suara Sarawak