Jasa raban Bujang Berani, Iban Tracker meruan dikeingat

KUCHING: Gerempung Veteran Soldadu Kor Renjer (PVTKR) nengah Tim Biro Pengintu Pendiau iya kemari bisi nyuaka bantu Wang Turu Pengingat ngagai siku waris Bujang Berani Iban Tracker ke baru udah midang.

Bujang Berani tu iya nya FF845 Tracker Belabut Anak Entawan, 91, asal ari Rumah Sujai, Nanga Melipis, Kanowit udah nadai ketegal sakit ba Sepital Sibu kena 13 Julai 2021.

Niang udah mujur dikuburka ba Pendam Kristian RC, Kanowit kena 14 Julai 2021.

Bepelasarka rikod servis, Tracker Belabut Anak Entawan tu berengkah diaku gawa kena 19 Mei 1951.

Iya dipadu gawa pengelama enam bulan nyaga pengelikun ba kandang kampung di menua Malaya begulai enggau raban Soldadu British.

Tracker Belabut Anak Entawan

Bekau ari pemujur servis nya, dia Belabut kala nerima midul tanda basa ke dikumbai ‘British Military Medal’ ari Soldadu British.

Nya alai, Presiden iya, Leftenan Kolonel (B) Mohd Melintang Abdullah ngarika raban PVTKR ngenataika penyinu ati ngagai sida niang sebilik.

Ku Melintang, jasa niang ke udah nyaup nyaga pengelikun menua endang dibasa sereta meruan dikeingat.

“PVTKR seruran betatika pengelantang semua raban veteran lebih agi bala Iban Tracker tauka Sarawak Renjer,” ku iya madah ngagai Ruai, Suara Sarawak.

Nya alai, dikena ngingatka jasa niang raban PVTKR udah ngelawa seraya nyuaka bantu ari Wang Turu Pengingat ngagai waris niang iya nya anak iya, Gat Anak Belabut di Taman Sri Moyan, Kuching.

 

MERUAN DIKEINGAT…Tim Pengintu Pengelantang, PVTKR betuaika Pegawai Waran II (B) Klement Nyapong (kanan) nyuaka bantu ngagai Gat Anak Belabut di Taman Sri Moyan, Kuching.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak