Jematan Batang Rambungan disadang tembu March 2023

KUCHING: Jematan Batang Rambungan disadang tembu 31 March 2023 asil ari pansik ke pemadu baru.

Menteri Muda Infrastruktur enggau Pemansang Penyangkai Kapal, Datuk Julaihi Narawi madahka naka diatu projek nya baru tembu 11 peratus ari taga asal 32.7 peratus.

“Jematan tu ila deka dikena semua penguna di Lundu, Sematan enggau Kuching.

“Kelimpah pemar lebuh Atur Mindah Betagang (PKP), kitai ulih meda semua projek jalai enggau jematan menua pesisir bejalai lanchar,” ku iya.

Julaihi bejaku munyi nya lebuh ngelawa Projek Jematan Batang Rambungan ditu, kemari.

Dulu ari nya, iya sempat dirandau sentang tikas pejalai projek ari Kepala Unit (Coastal and Second Trunk Road Unit) Opis Kereja Raya (JKR) Sarawak Roland Ting Ka Swee.

Ku iya, projek ngaga jalai enggau jematan ba palan menua pesisir sebagi ari juluk ati perintah menua ti diuluka Kepala Menteri Datuk Patinggi Abang Johari Tun Openg.

“Dermaga (Pier) keterubah enggau dermaga kedua udah tembu ngilah ke Kuching kitu.

“Tang pemar pemadu besai iya nya ngaga dermaga ketiga enggau keempat laban dermaga tu deka bejantil merakak sungai,” ku iya.

Sama bisi datai Sekretari Mendam Opis Menteri Infrastruktur enggau Pemansang Penyangkai Kapal Datuk Safri Zainudin enggau ke bukai.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak