Juluk Imuniti Beraban mesti dijapai lengkas

SARATOK: Bekau ari pengerekai varian baru penyakit covid-19 dikumbai Varian Delta chukup dikenangi laban jampat berampit, nya kebuah juluk Imuniti Beraban mesti dijapai lengkas.

Kaban Parlimen Saratok, Datuk Ali Biju madahka semina nya aja chara ulih ngasuh pandemik Covid-19 tu jampat pukas.

Ku iya, pengerekai varian baru nya balat ngirauka ati rayat menua tu bepelasarka penyampau kes positif baru ninting hari dirikod.

“Aku dekaka pengidup kitai ulih pulai likun enggau lantang, nadai penangi enggau pengirau agi lebuh mindah, bejalaika pengawa besehari sehari enggau ke bukai baka selama.

“Nya alai aku mekat bala tuai raban bansa enggau tuai komuniti bela begempung enggau besaup gawa nentuka Program Betuchuk Vaksin Nasional (PICK) ulih nyapai tagit,” ku iya ba sebengkah penerang berita kemari.

Ali ke mega Adun Krian mekat baru, bala tuai raban bansa mesti meransang genap iku anembiak sida ti patut betuchuk vaksin ngerejister nama diri.

Sida tau betanya terus ngelawa enggau betanya ngagai staf Opis Pelilih tauka Palan Betuchuk Vaksin (PPV) pemadu semak nentuka nadai siku anembiak sida tinggal.

“Nitihka penerang ari Opis Pengerai Pelilih Saratok, naka 20 Julai 2021, sepenyampau 25, 906 iku rayat ba sitak parlimen tu ti patut betuchuk vaksin udah betuchuk dos keterubah.

“Lalu 18, 681 iku udah nerima dos kedua. Terus iya, 42.45 peratus ari urung 44, 000 peranak Saratok ti patut betuchuk udah divaksin lebuh.

“Taja pia, penyampau nya jauh tinggal enti dibida penyampau tubuh betuchuk vaksin renggat Nengeri ke diatu udah manggai 47.3 peratus enggau penyampau 967, 201 udah nerima kededua-dua dos,” terang iya nyemetak.

Ari gaya perati dalam bulan nyin tadi ku Ali, PICK ba sitak menua dipegai iya lanchar sereta nerima kerejasama ari mayuh bengkah ejensi Perintah Besai enggau Perintah Sarawak empu kelebih agi Opis Pelilih enggau Opis Pengerai Pelilih.

Tagit ba renggat Nengeri nentuka kitai mujur nyapai Imuniti Beraban datai ba ujung bulan Ogos 2021 lalu besai amat pengarap iya sitak Saratok ulih nyapai tagit nya.

“Aku sekali agi mekat semua kitai ditu, sinu sereta kasihka raban terabai komuniti ti kiruh enggau ketegal nadai kala ngetu gawa kenyau ari pandemik nuntung menua suba.

“Minta kasihka kita ngambi seruran nyaga pengerai diri, basu belama jari ngena sabun, seliahka diri ari endur ti dedat sereta nyaga takah kelimpah ngasika semua Atur Pengawa Standard (SOP) laban menua agi sigau,” ku Ali mekat.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak