Juluk pemansang Hidrogen Gadung

KUCHING: Pemansang Hidrogen Gadung entara juluk deka dijapai Sarawak dalam Industri Nyaga Rampa Menua setipak enggau Perambu Strategik Pemansang Lepas Covid-19.

Sapit Kepala Menteri Datuk Amar Awang Tengah Ali Hasan madahka strategi besai Pemansang Lepas Covid-19 2030 tu fokus ngagai sektor strategik ti ulih matak besai penatai pemisi ba dalam ekonomi nengeri Sarawak nyentuk taun 2030.

“Kami ngelaluka pemeranak puku baka tu ngambi ulih numbuhka peluang ekonomi enggau sosial nengeri Sarawak,” ku iya.

Iya mansutka jaku nya nengah sebengkah aum pemberita diatur nengah chara digital ke bela digulu Menteri Utiliti, Datuk Sri Stephen Rundi Utom, Menteri Muda Pemansang Dagang Jelan Pemesai enggau Pengawa Dagang, Datuk Naroden Majais, Menteri Muda Pemansang Industri, Datuk Malcolm Mussen Lamoh, Sekretari Perintah Nengeri Sarawak, Datuk Amar Jaul Samion enggau pegawai kanan perintah ke bukai.

Awang Tengah ti mega Menteri Dagang Entarabansa enggau Industri, Pemansang Pengawa Dagang enggau Industri Terminal udah baum enggau pedagang ari Australia nengah chara digital berandauka pasal pemansang projek besai Pemansang Hidrogen Gadung ba Sarawak.

Suara Sarawak