Kes nambah bepun ari pemindah kin kitu

SARATOK: Opis Pengerai Malaysia (KKM) Bagi Menua Betong melabaka pejalai mindah ngilah pelilih menua ngujungka penyadi kes positif Covid-19 ti majak nambah ba pelilih Saratok.

Direktor iya, Dr Johnny Pangkas madahka berindik ari pansik tumu ti benung dipejalaika raban KKM dia mandangka kelai kes positif ti majak nambah di Saratok beduduk ari pemindah mensia mayuh kin kitu ngilah pelilih menua.

“Diatu kitai sama nemu ba pelilih Saratok bisi nambah kes positif Covid-19 manggai 131 iti baka kes ti bisi nuntung sebuah rumah panjai.

“Iya ke balat ngirauka ati kami (KKM) diatu, mayuh kes positif ti bisi nyadi tebal agi bepun ari gaya ulah mindah kin kitu.

“Sida tu tadi bisi ngembuan kelai kena rampit baka tabin,batuk enggau ke bukai lalu pengudah diperesa ngayanka pemutus positif,”ku iya madah ngagai Suara Sarawak.

Nangkan ke nya, iya madah naka tu agi nadai sebarang perambu deka muka Palan Kuarantin enggau Perubat Pesakit Regas Covid 19 (PKRC) ba Saratok laban pekara tu begunaka Atur Pengawa Standard (SOP).

Taja pia, kami kami endang semampai meri kerejasama penuh lalu nitihka atur ke patut nyema PKRC ditu patut ditambah ke pemaik pengelantang pesakit, ku iya.

Naka 22 Julai tu tadi, pelilih Saratok ngerikodka 131 iti kes positif Covid 19 ditangkan 17 kes (24 Julai) enggau 8 kes (25 Julai).

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak