Kisah Bujang Berani : Koperal (B) Kuda Kanawang jeman menua agi sigau

LEKA seterum penabur ari senyata munsuh rembus ba rusuk kanan enggau perut Koperal (B) Kuda Kanawang ngujungka iya rebah lalu utai dipeda pan nyau rapas.

Lebuh tubuh sepiak kanan iya lemi, anak Iban ari Balingian tu naka ulih narit senapang enda jauh ari kaki kiba iya.

“Aku pan enda nemu dini bulih pengering laban aku ulih nimbak munsuh ke diau lima depa ari kami lebuh komunis nya baru deka nyelinting nimbak aku enggau bakih aku,” ku iya ke berengkah masuk Raban Renjer Hutan maya beumur 25 taun.

Kuda ke diatu beumur 82 taun ngaku iya agi teingatka kenang begulai enggau raban platun bukai disubuk enggau diserang lebuh ngerintis lalu enda disangka betembung enggau munsuh.

Ku Kuda, hari besejarah nya nyadi kena 12 Februari 1972 lebuh iya enggau bala platon ngerintis ngambi nirika kimis pengudah datai ba Tanjung Kuning, Sarikei nepa dua perau nyereta Ops Ngayau di Lubuk Bulat, Binatang (diatu dikumbai Bintangor).

NADAI NGIRA PEMEDIS… Kuda mantaika baju dikena iya lebuh gawa nyadi Renjer Hutan.

Kuda madah, pengudah nimbak tubuh iya labuh tang disambut bakih iya lalu dibai nuju tubuh munsuh ke udah sulai nya.

Lebuh Kuda meda tubuh munsuh nya, taja utai rapas dipeda tang iya ulih meda dua iku lelaki enggau siku indu nya agi idup.

“Indu nya bedau parai… tubuh iya nadai tama leka seterum laban tubuh iya kebal,” ku Kuda tang alit ati laban bakih iya madah lebuh ditan, raban iya tetemuka mayuh leka seterum ke udah ditimbak nya ditaruh dalam kantung indu nya.

KERING SEMENGAT

Ba mua munsuh lelaki nya, Kuda ke enda dapat ketegal bakal ditimbak udah diasuh bakih iya ngirup darah sida ke udah sulai nya.

“Bakih aku terus ngeraup darah munsuh lelaki ke bebadi ketegal ditimbak aku lalu mapa darah likat nya ngagai mulut aku lalu keran ngasuh ngirup darah nya.

“Setengah mua aku basah laban darah komunis ke agi angat. Berasai bau lang darah munsuh nya tama ngagai nyawa aku.

“Lebuh nya, bakih aku madah ngirup darah munsuh ke kena timbak kitai nya tau ngasuh kering semengat lalu nadai nangi maya beperang,” ku iya nusui sambil megai mulut enggau jari kanan lebuh ngenang pekara nya.

NYADI KENANG… Gambar kenang Kuda enggau bala platun bukai lebuh gawa nyadi Renjer Hutan.

Sebedau penusah nya, Kuda orang keterubah tetemuka dua bom panjuk tauka ‘jerangkap samar’ ke udah nyelamatka enam iku platon bukai ari bakal.

Ku Kuda, darah enda ngetu pansut ari rusuk enggau perut iya ketegal kena timbak leka seterum penabur komunis tang bakih platon keran mai iya ngagai Sibu ngambi diperubat.

“Pejalai ari Binatang (Bintangor) ngagai Sibu ngena bot laju.. naka pemedis aku lebuh nya laban bot nyau dipangka ke arus gelumbang.

“Mati aku tuan… ku aku bejaku ngagai Tuan Patrick Bryan ke betuaika platun lebuh nya laban bot laju dipangka gelumbang laban naka pemedis tubuh aku lebuh nya,” ku sebana Kuda.

Sedarka Kuda balat ngenatka pemedis, tuai enggau dua iku bakih iya ngasuh sida betukar bot ngena perau panjai peranak semak sungai ditengah sida.

Kuda digiga Komunis maya diperubat

Lebuh datai ba atas perau, Kuda ulih ngenatka abi timbal dataika selamat datai ngagai Sepital Sibu lebuh nya.

“Seingat aku, aku ditimbak urung pukul 2.10 ngalih hari lalu pukul 6 lemai nya aku dibuntas mansutka leka seterum ke tekait entara tulang rusuk sereta penabur nya pechah dalam perut,” terang iya.

Pengudah tiga hari diperubat ba sepital, Kuda madahka lebuh enchelak iya meda diri tegali lalu meda tubuh Tuan Bryan, bakih platun iya, Wan Ali enggau raban polis ke enda dikelala udah ba sepiak iya.

Ku Kuda, bakih iya Wan Ali bendar nundi iya lalu madah, “Aku jaga kau…rasa jaga Gabenor sedang sakit”.

Jaku bakih iya mandangka nama utai ke nyadi lebuh iya enda sedarka diri. Indu misi mega madah ngagai Kuda bisi tiga iku komunis nyaru diri ngiga bakih sida ke bakal maya Ops Ngayau.

Sida datai ke sepital laban deka munuh Kuda, tang ulah raban Parti Komunis Kalimantan Utara (PARAKU) nya mujur dipuntan lebuh indu misi telefon ngagai Kem Polis Lanang lalu ngasuh raban pengelikun bejejaga nentuka nadai komunis nyaru enggau tama ngagai sepital.

“Sida (Komunis) bendar ngiga aku, berapa hari udah nya Kem Polis Lanang mega diserang lebuh dawai beduri dikempat komunis ngambi sida ulih nyerang,” ku iya lalu madahka diri agi ba sepital maya penyadi nya.

BUJANG BERANI… Kuda entara bujang berani ke kala bakal kena timbak lebuh nyaga pengelikun menua maya menua agi sigau kelia.

300 KOMUNIS DITANGKAP

Ku Kuda, raban polis sikar bejalaika pengawa lebuh nemu raban komunis ngereja pengawa nya lalu sida mujur tetemuka modus operandi sida di Sibu.

“Sida deka munuh aku tang salah chara lebuh lebih 300 komunis ke nyaru nyadi orang periman mujur ditangkap lalu tebal agi sida belakun nyadi tukang kebun enggau pedaja di pasar,” terang Kuda.

Ku iya, utai ke balat dikenakut lebuh iya agi diperubat ba sepital, komunis kala tama ngagai rumah iya di Kuartes Sibu ke alai lebuh nya bini enggau dua iku anak iya baru beumur lima enggau enam taun di rumah.

“Bini aku manjung lalu panjung iya didinga orang sepiak lalu beguai meh sida datai ke rumah tang komunis nya udah ngelarika diri,” ku iya ringat lebuh ngenang cherita.

Kuda enda ulih gawa sereta beperang baru ketegal tubuh iya balat bakal enggau lubah suman lalu iya semina diasuh gawa ba opis dataika pinchin.

“Enam bulan pengudah aku dipindah ngagai Pantu nyadi Intelligent enggau gawa ba opis aja,” ku iya seraya madahka tubuh iya lama amat bungkuk bekau kena timbak nya.

Sebedau Operasyen Ngayau, Kuda kala gawa nyadi Jaga Kem lebuh Perang Ganyang Malaysia maya Konfrontasyen Indonesia-Malaysia di Engkilili ba taun 1965.

Pengelama 31 taun tiga bulan gawa, Kuda kala nerima Pingat Jasa Pahlawan Negara ba taun 2019 ari Menteri Besai Tan Sri Muhyiddin Yassin lebuh iya nyadi Menteri Penyaga Menua.

BUJANG BERANI… Kuda mantaika mua iya agi biak suba.

JAGA MANAH MENUA KITAI

Beserimbai enggau Hari Sarawak tu tadi, Kuda mesan rebak biak patut terus nyaga Sarawak ungkup pengelantang semua rayat.

“Enti kami suba nyaga Sarawak ari diserang munsuh komunis maya menua agi sigau.

“Nembiak diatu dipinta nyaga Sarawak ari pekara negatif enggau pekara ke enda menuku ke tau ngeruga pengelikun menua dataika kitai enda talukka menua,” ku iya nyemetak madah.

Nambahka nya, Kuda ngarapka nasip Bujang Berani baka iya enggau bala bukai nerima perati Perintah Sarawak.

“Kenang meh seagi nyawa bedau padam lalu anang ngasuh cherita kami berambunka nyawa nyaga pengelikun menua lesap baka pemati kami ila,” ku iya ke sinu ngenang semua nya.

SEJARAH MENUA…Hari besejarah nya nyadi kena 12 Februari 1972 lebuh iya enggau bala platon ngerintis ngambi nirika kimis pengudah datai ba Tanjung Kuning, Sarikei.
 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak