Lady Jay deka ngeluarka lagu Petenah, nangkan pemujur lagu Anang Jera

KUCHING: Sepengudah lagu ‘Anang Jera’ pansut bulan Ogos 2020 tu tadi, Lady Jay deka datai baru enggau siti agi lagu baru dikumbai Petenah.

Penanyi asal Simunjan tu madahka Anang Jera sebuah lagu ti dikeluarka iya ba baruh perabung Twintone Production udah mujur ditapis RTM ngambika ulih ditebah ba radio.

“Lirik enggau tiun Anang Jera ditengkebang Ijal Jainal lalu muzik lagu ditusun Ijal Jainal begulai enggau Boymax Siburan.

“Anang Jera berentak ranchak, ngasuh orang rindu ati ninga enggau chukup engkeman disadaka lebuh maya pengerami melah pinang tauka pengerami bukai,” ku iya lebuh dirandau Suara Sarawak, kemari.

Ku Lady Jay, kelimpah rinduka lagu ranchak, iya mega rindu ngerichahka industri muzik Iban.

RINDU BELAGU…Lady Jay maya dikangau merindang sebedau pengerekai

“Naka tu, Anang Jera semina lagu rumpas aja, enti bisi jereki dudi hari aku deka mai lagu tu dalam album kompilasi.

“Lagu tu semina dikena kitai beperindang tauka bebuti sereta nadai sangkut paut enggau pejalai pengidup siku-siku,” ku iya.

Lady Jay kala ngeluarka dua buah lagu sebedau tu iya nya Pengerindu Setengah Jalai enggau Puang ti dipasukka ba album kompilasi Kaban Muzik Production (KMP).

Ngelansa Lagu Petenah, Lady Jay mega madahka lagu nya mega ditengkebang bakih iya Ijal Jainal.

“Nyema nadai penanggul ujung taun tu lagu Petenah deka dikeluarka ba media rama, ngarapka bala peminat sabar dulu.

“Belubah aku nitihka singkang orang laban sigi rindu ke pengawa belagu, laban belagu siti ari chara aku ngempaska asai ati maya gaga, sinu tauka sunyi,” ku iya.

Iya mega madahka, anak, apai, indai enggau menyadi nyadi tiang sukung iya dalam ngatur semua pengawa dalam dunya pemerindang enggau bedagang.

“Enda tinggal bala bakih ti sama nyadi pemerindang mega selalu meri ajar enggau sanding penemu ngagai aku.

“Sida enda nemu leju meri jaku peransang kelebih agi baka komposer Ijal Jainal ti udah pechayaka aku mai lagu Anang Jera enggau Petenah,” ku iya.

Ungkup penemu mega, kenyau empat bulan udah dipasukka ba youtube dia lagu Anang Jera udah dipeda 4,400 iku.

Sebedau tu, lagu Puang udah balat ngeruntun ati mensia mayuh ti ninga laban lagu nya ditujuka Lady Jay ngagai orang ti pemadu dikesayau iya (Niang laki iya, DSP Micheal Padel) ke udah midang ketegal ngetanka menua ba taun 2013 suba.

Lagu Puang dikeluarka iya ba taun 2019, ditengkebang Matthius Mambang enggau Jesley Jabu ba baruh perabung KMP.

Arapka peminat besabar nganti penatai lagu Petenah ari Lady Jay udah tu.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak