Lebih 60 kangau tasah diterima Hope Place sekumbang PKP

KUCHING: Mayuh orang nyengkaum orang tuai napi penusah kenyau ari Atur Mindah Betagang (PKP) diterit berengkah bulan June tu tadi.

Tang, sekeda ari tu bisi udah berasai lantang mimit pengudah Hope Place Kuching datai ngesah lalu meri bantu pemakai ngagai sida.

Sebedau tu, Hope Place Kuching udah meri bantu ngenyit ngagai ruang bilik ti diasuh kuarantin, sitak Atur Mindah Betagang Bepekul (PKPD) enggau raban terabai komuniti.

Pia mega, Hope Place Kuching naka ulih meri bantu sekali terima ngagai pengereja begaji hari kelebih agi sida ke nadai kereja jam diatu enggau orang tuai ke napi penusah maya PKP tu.

Pemungkal Hope Place Kuching, Kelvin Wan madah bekaul bantu ungkup orang tuai, sida nerima lebih ari 60 kangau telefon ukai semina minta bantu pemakai tang bisi kedua nya minta bantu tusu tepung enggau lampin anak mit.

BEMACHAM BANTU… Kelimpah ari bantu pemakai, Hope Place Kuching mega meri kerusi roda.

Ku iya, ari kangau telefon diterima kelimpah ari ruang bilik ke bisi anak mit, sida nerima kangau ari orang tuai ke tusah sereta nadai endur minta bantu.

“Kami kala nerima kangau ari siku orang tuai ke ngena kerusi roda diau enggau dua iku uchu iya.

“Orang tuai nya bendar nyabak laban tusah ati ngenang pengidup sida meuchu maya tu,” ku Kelvin.

Nangkan nya, iya madahka Hope Place Kuching mega nerima kangau ari dua iku orang tuai ke enda nemu dini endur minta bantu laban seduai nadai perengka pengangkut dikena mindah.

“Kala mega nerima kangau ari siku indu beumur 75 taun madahka seduai laki iya beumur 80 taun agi tepekul ba Samarahan lalu iya diau kediri enggau anak iya sakit runding (OKU) lalu enda nemu diri endur minta bantu,” terang iya baru.

Taja pia, Kelvin madahka sida deka beratika dulu pengudah nerima kangau nentuka sida ke telefon nya amat begunaka bantu tauka enda.

“Kebuah pia laban bantu ngenyit tu semina diberi ngagai sida ke tusah maya PKP tu lalu kami mega ngemeratka ruang bilik ke bisi anak mit enggau orang tuai ke jauh ari sida sebilik,” terang iya.

Mensia mayuh diperansang nyauak bantu pemakai tauka pemeri ngambi nyaup sida ke tusah lalu Hope Place Kuching meri besai terima kasih ngagai sida ke udah gerah jari nyukung pengawa sida ngelama tu.

Mensia mayuh ulih nyuaka pemeri nya terus ngagai akaun bank Maybank (511289001160) tauka ngelawa laman Facebook Hope Place Kuching ngambi kod QR Pay Sarawak.

Ungkup penerang silik, mensia mayuh tau telefon ngagai Hope Place ba lumur, 082-505987 lalu Hope Place Kuching tu dibuka Hari Satu ngagai Hari Lima berengkah ari pukul 8 pagi nyentuk 5 lemai seraya kena Hari Enam, sida berengkah gawa ari pukul 8 pagi nyentuk 12 tengah hari.

Suara Sarawak