MP Hulu Rajang ngesah raban tasah angus di Uma Seping Kajang

KUCHING: Penusah ti nuntung peranak Uma Tr Yan Ketek, Uma Seping Kajang udah nerima perati Kaban Parlimen (MP) Hulu Rajang, Datuk Wilson Ugak Kumbong.

Ugak bisi nyuaka belanja RM10, 000 lalu RM13, 000 deka diberi dudi ungkup 13 pintu ke napi penusah nya.

“Lebuh ninga berita tu, berumban aku datai laban berasai sinu ngenang penusah ti nuntung peranak di Uma Tr Yan Ketek lalu naka ulih meri belanja enggau bantu bukai.

“Meri penyinu ati ngagai peranak di Uma Tr Yan Ketek tu, arapka besabar nempuh penguji tu.

“Aku naka ulih mantu ngelempung tating penusah besai ditapi sida ke tasah angus tu.

“Terima kasih nuju bala bukai ke udah datai ngabas sereta mantu ngelempung tating penusah peranak di Uma Tr Yen tu,” ku Ugak lebuh ngabas peranak ti tasah angus nya.

Ba pengawa nya mega, Ugak udah nyuaka bantu pemakai enggau ai irup sereta barang diguna ke bukai ungkup peranak 13 pintu nya.

Kena 22 Julai tu tadi, peranak 13 pintu di Uma Tr Yan Ketek semina tinggal gari ba punggung aja pengudah rumah panjai nya angus tang nadai penusah bebadi nyawa diripotka.

Ba lansa bukai, sebedau tu Ugak udah ngabas pengawa meri vaksin Covid-19 di Long Peran, Belaga.

Ba pengawa nya, iya udah nyuaka chek RM15,000 ngagai Komiti Pemansang enggau Pengelikun Genturung Pendiau (JKKK) Uma M.U Duren Luhat Long Peran.

Ugak meri besai terima kasih ngagai raban terabai komuniti laban udah bebendar gawa ngerumban pengawa meri vaksin nentuka menua kitai nyapai imuniti beraban.

Nangkan nya, iya mega meri terima kasih ngagai peranak di Long Peran laban udah meri kerejasama sereta datai nerima vaksin.

Sama datai Adun Murum, Kennedy Chukpai Ugon, Residen Kapit Nyurak Keti, Pegawai Pelilih Belaga Juan Ubit, Sapit Pegawai Pelilih Jackson Kong enggau kaunsilor ari Kaunsil Pelilih Belaga.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak