Palan internet deka ditumbuh ba sitak PBT

KUCHING: Opis Penguasa Kandang Menua (PBT) di Sarawak diperansang ngena teknologi dalam meri servis ngagai rayat di menua tu.

Kepala Menteri Datuk Patinggi Abang Johari Tun Openg madahka, dalam nyapai pekara nya Perintah Sarawak nengah Opis Pemansang Ekonomi Sarawak (SEDC) deka numbuhka Palan Internet ba baruh palan PBT enggau Komiti Pemansang enggau Pengelikun Genturung Pendiau (JKKK).

“Naka diatu, ke ditemu aku Kuching enggau Miri udah bisi Palan Internet nya.

“Nya alai, aku minta PBT ke bukai ngena teknologi dalam meri servis ti lebih manah ngagai mensia mayuh kelebih agi genturung pendiau ti besai,” ku iya.

Abang Johari madah munyi nya sebedau ngemataka Pengawa Angkat Sumpah Nyirika Baru 758 iku Kaban PBT Sarawak nengah chara online ditu, kemari.

Iya mega ngelalau PBT ba menua tu ngembuan pelasar diri empu mantu mensia mayuh kelebih agi orang dagang mit ba baruh sida maya napi pengerekai pandemik Covid-19.

“Kitai baru udah ngelancharka Strategi Pemansang Pasca Covid-19 2030 (PCDS 2030) ungkup Sarawak dikena ngenegapka ekonomi empas ari pengerekai pandemik.

“Nya alai, aku minta ngambika PBT ngena PCDS 2030 nyadi sanding penemu dalam ngiga chara ngemanahka ekonomi,” ku iya.

Tandu iya, pengerekai Covid-19 bedau ditemu kemaya punas tang udah bisi tanda nunjukka Sarawak ulih nagang pengerekai penyakit nya.

“Lebuh datai maya ila, kitai deka ulih muka baru semua sektor ekonomi,” ku iya.

Ungkup rekod, sepenyampau 758 iku kaban kaunsil dichiri baru megai tanggungpengawa nya berengkah 1 Julai 2021 ngagai 30 June 2022.

Program ngangkat sumpah enggau ‘Ikrar Bebas Rasuah’ kemari diuluka Datuk Bandar Majlis Perbandaran Miri (MCC) Adam Yii.

Sama bisi datai, Sekretari Perintah Nengeri Datuk Amar Jaul Samion, Menteri Kandang Menua enggau Pengawa Berumah Datuk Seri Dr Sim Kui Hian, Menteri Muda Kandang Menua enggau Pengawa Berumah Datuk Dr Penguang Manggil enggau Sekretari Mendam Opis Menteri Kandang Menua enggau Pengawa Berumah Datuk Antonio Kahti Galis.

 
Artikel ini ialah Hakcipta Terpelihara Suara Sarawak. Sebarang salinan tanpa kebenaran akan dikenakan tindakan undang-undang.

Suara Sarawak